აჭარის ავტონომიური რესპუბლიკის შესახებ კონსტიტუციური კანონით და აჭარის ავტონომიური რესპუბლიკის კონსტიტუციის თანახმად, უმაღლესი საბჭო ვალდებული იყო შეკრებილიყო არჩევნებიდან არაუგვიანეს ერთი თვისა, შესაბამისად დღეს შეიკრიბა უმაღლესი საბჭო, – განაცხადა აჭარის უმაღლესი საბჭოს თავმჯდომარემ დავით გაბაიძემ გადაცემაში „დღის ქრონიკა“.
„უმაღლესი საბჭოს 13 წევრი გამოცხადდა დღევანდელ სხდომაზე, 11 წევრი საკმარისი იყო იმისთვის, რომ სხდომა შემდგარიყო. ჩვენ უმრავლესობაში გვაქვს 13 მანდატი და მისი მეშვეობით შესაძლებელი იყო უმაღლესი საბჭოს არანაკლებ ორი მესამედის სრული უმაღლესი საბჭოს ცნობა. ის რომ ჩვენი ოპოზიციონერი კოლეგები არ იმყოფებოდნენ სხდომათა დარბაზში ეს სამართლებრივად არანაირი დაბრკოლება არ ყოფილა იმისთვის, რომ უმაღლეს საბჭოს დაეწყო უფლებამოსილების განხორციელება.
დღევანდელ სხდომაზე არჩეული იქნა თავმჯდომარე, თავმჯდომარის მოადგილე, კომიტეტების თავმჯდომარეები, შეიქმნა ფრაქციები, ახალარჩეული საბჭოს საორგანიზაციო ნაწილი პრაქტიკულად გავლილია. ჩვენ ხვალიდან სამუშაო რეჟიმში ვიწყებთ მიმდინარე საქმიანობას ველოდებით აჭარის ავტონომიური რესპუბლიკის მთავრობისგან მომდევნო წლის ბიუჯეტის გადამუშავებულ ვარიანტს, რომელიც დაახლოებით 850 მილიონი ლარია და გაცილებით მეტია ვიდრე 2012 წელს გვქონდა.
გვაქვს ამბიციური გეგმები და ეს ბიუჯეტი გადანაწილებული იქნება მოსახლეობის საჭიროებების შესაბამისად“, – აღნიშნა დავით გაბაიძემ.