ეუთო-ოდირმა სათანადოდ შეაფასა ეს არჩევნები, მაგრამ ვიღაცები ვერ თმობენ სურვილს, რომ „ნაცები“, მკვლელები და მწამებლები დააბრუნონ ხელისუფლებაში – რა თქმა უნდა, ეს ვერავითარ შემთხვევაში ვერ მოხდება, – განაცხადა საქართველოს პრემიერ-მინისტრმა ირაკლი კობახიძემ დღევანდელ პრესკონფერენციაზე.
პრემიერის თქმით, ქართულ საზოგადოებას მკაფიოდ აქვს გამოხატული საკუთარი არჩევანი და ყველაფერი მოხდება ისე, როგორც ქართველმა ხალხმა ისურვა.
„2020 წელს ეუთო-ოდირმა აღიარა არჩევნები, თუმცა იქაც გვითხრეს, რომ ოპოზიცია რადგან არ შემოდიოდა პარლამენტში, ეს იყო ე.წ კრიზისი. მაშინაც იგივე იყო. ეუთო-ოდირმა დადო მაშინაც ობიექტური შეფასება, რასაც ვერ შეეგუა მაშინ ვერც რადიკალური ოპოზიცია და ვერ შეეგუვნენ მათი პატრონები. ახლაც იგივე ხდება, მათ ეშინიათ და არ მოსწონთ სამართლიანი შეფასება, ყველაფერს აკეთებენ იმისათვის, რომ რაღაცნაირად „ნაცები“ დააბრუნონ ხელისუფლებაში. რა თქმა უნდა, ეს ვერ მოხდება. არის ეუთო-ოდირის შეფასება, ეს არის ფაქტი, რასაც ვერ გაექცევა ვერც რადიკალური ოპოზიცია საქართველოში, მით უმეტეს, რომ მათ ირიბად თავადაც აქვთ აღიარებული არჩევნების ლეგიტიმურობა. გახარია ამბობს, რომ მიიღო 141 500 ხმა, სად გაექცევა ამ აღიარებას. როცა ხაზარაძეს აქვს ნათქვამი, რომ 200 000 ხმა აქვს მიღებული დაახლოებით და ცესკოს აქვს დაფიქსირებული 182 000 ხმა, სად გაექცევა ხაზარაძე ამ წამოცდენას, ამ აღიარებას, რომელიც პირდაპირ დევს საჯარო სივრცეში. დანარჩენი რჩება გაყალბებული ეგზიტპოლები – წინათ გააყალბეს პივიტი, ახლა ვეღარ გააყალბეს პივიტი, იმიტომ, რომ ამას თავის დროზე დიდი აჟიოტაჟი მოჰყვა, უცხოეთიდან დაფინანსებული ენჯეოს მიერ გაყალბდა პივიტი, როგორც გახსოვთ, ახლა გააყალბეს ეგზიტპოლები. რა ფასი აქვს „ნაცმოძრაობის“ მიერ ჩატარებულ, გაყალბებულ ეგზიტპოლებს – არაფერი, რჩება ეუთო-ოდირი, რომელმაც სათანადოდ შეაფასა ეს არჩევნები, მაგრამ ვიღაცები ვერ თმობენ სურვილს, რომ რაღაცნაირად, „ნაცები“ დააბრუნონ, მკვლელები და მწამებლები დააბრუნონ ხელისუფლებაში. რა თქმა უნდა, ეს ვერავითარ შემთხვევაში ვერ მოხდება, ქართულ საზოგადოებას მკაფიოდ აქვს გამოხატული საკუთარი არჩევანი და ყველაფერი მოხდება ისე, როგორც ქართველმა ხალხმა ინება“, – განაცხადა პრემიერმა.