თბილისის საქალაქო სასამართლომ ჯგუფურ ძალადობაში მონაწილეობის ბრალდებით დაკავებულ მსახიობ ანდრო ჭიჭინაძეს, ასევე იუმორისტ ონისე ცხადაძესა და კიდევ ოთხს პირს – ჯანო არჩაიას, რუსლან სივაკოვის, ლუკა ჯაბუას და გურამ მირცხულავას აღკვეთის ღონისძიების სახით პატიმრობა შეუფარდა.
გადაწყვეტილება თბილისის საქალაქო სასამართლოს მოსამართლემ, თამარ მჭედლიშვილმა მიიღო.
დაკავებულებს გამოძიება ედავება სისხლის სამართლის კოდექსის 225-ე მუხლის მეორე ნაწილით გათვალისწინებულ დანაშაულს, რაც ჯგუფურ ძალადობაში მონაწილეობას გულისხმობს. აღნიშნული დანაშაული სასჯელის სახედ და ზომად ოთხიდან ექვს წლამდე თავისუფლების აღკვეთას ითვალისწინებს.
სასამართლო სხდომაზე ბრალდებულმა ანდრო ჭიჭინაძემ სიტყვით ისარგებლა.
„ბევრი არაფერი მაქვს სათქმელი. სიმართლე როცა შენ მხარესაა, მაშინ გეძლევა ძალაც და ენერგიაც. ეს ძალა და ენერგია დღეს აქ არის“, – განაცხადა ბრალდებულმა.
მოსამართლეს გირაოს შეფარდების თხოვნით მიმართა ბრალდებულმა ონისე ცხადაძემ.
„ყველაფერს ვფიცავ, არავის არაფერში ხელს არ შევუშლი და პირიქით, ვითანამშრომლებ გამოძიებასთან. გთხოვთ, აღკვეთის სახით გირაო შემიფარდოთ“, – განაცხადა ონისე ცხადაძემ.
დაკავებულების ადვოკატები აცხადებენ, რომ აღკვეთის ღონისძიების გადაწყვეტილებას გაასაჩივრებენ.
ექვსივე დაკავებულის საქმეზე წინასასამართლო სხდომა 16 იანვარს ჩაინიშნა.