ეს გადაწყვეტილება ამით არის მნიშვნელოვანი, რომ გარდა იმისა, რომ საკუთრების უფლებას გაესვა ხაზი, სასამართლომ კიდევ ერთხელ მიანიშნა რუსეთის ფედერაციას, რომ მან უნდა უზრუნველყოს საქართველოს ოკუპირებული ტერიტორიებიდან დევნილი პირების საკუთარ საცხოვრებელ ადგილას დაბრუნება, – განაცხადა იუსტიციის მინისტრის მოადგილემ ბექა ძამაშვილმა „დღის ქრონიკაში“.
ის აღნიშნული კომენტარით სტრასბურგის სასამართლოს გადაწყვეტილებას გამოეხმაურა.
„მოსარჩელე ფიზიკური პირები ამ საქმეში ითხოვდნენ საკუთრების უფლების დარღვევას როგორც რუსეთის ფედერაციის მხრიდან, ასევე საქართველოს მხრიდან. ლოგიკურია, რუსეთის ფედერაცია როგორც ოკუპანტი ძალაა პასუხისმგებელი ამ დარღვევებზე, თუმცა მომჩივნები ასევე უთითებდნენ მათ შორის საქართველოს პასუხისმგებლობას, რადგან იურიდიულად აფხაზეთი არის საქართველოს ტერიტორია და ისინი დავობდნენ, რომ საქართველოსა ჰქონოდა პასუხისმგებლობა. თუმცა ჩვენი ქვეყნის გამარჯვება ნამდვილად არის ის, რომ ამ გამარჯვებით დადასტურდა, რომ ოკუპირებულ ტერიტორიებზე პასუხისმგებლობა სრულად ეკისრება რუსეთის ფედერაციას, ადამიანის უფლებების დარღვევას ვგულისხმობ და საქართველოს ხელისუფლება ახორციელებს მის ხელთ არსებულ ყველა შესაძლო ღონისძიებას იმისათვის, რომ დარღვევები აღმოიფხვრას.
ამ შემთხვევაში, ევროპულმა სასამართლომ კიდევ ერთხელ დაადასტურა, რომ საქართველოს მხრიდან ყველაფერი იყო განხორციელებული, მათ შორის მომჩივნების საკუთრების უფლებების დასაცავად. რუსეთის ფედერაციის პასუხისმგებლობა გულისხმობს მომჩივნებისთვის ფინანსური კომპენსაციის ანაზღაურებას. თუმცა, ამ გადაწყვეტილების მნიშვნელობა გაცილებით დიდია, ვიდრე კონკრეტულად მომჩივნებისთვის ფინანსური ანაზღაურება, რადგან კიდევ ერთხელ ხაზი გაესვა იმას, რომ აფხაზეთი არის საქართველოს განუყოფელი ნაწილი, ის ოკუპირებულია რუსეთის მიერ. მიუხედავად იმისა, რომ ეს დავა საკუთრების უფლებას ეხებოდა, ევროპულ სასამართლოს კიდევ ერთხელ მოუწია ეხსენებინა, რომ ნებისმიერ დევნილს აქვს საკუთარ საცხოვრებელ ადგილებზე დაბრუნების უფლება და ეს გადაწყვეტილება ამით არის მნიშვნელოვანი, რომ გარდა იმისა, რომ საკუთრების უფლებას გაესვა ხაზი, სასამართლომ კიდევ ერთხელ მიანიშნა რუსეთის ფედერაციას, რომ მან უნდა უზრუნველყოს საქართველოს ოკუპირებული ტერიტორიებიდან დევნილი პირების საკუთარ საცხოვრებელ ადგილას დაბრუნება“, – აღნიშნა ძამაშვილმა.
იუსტიციის სამინისტროში დღეს ბრიფინგი გაიმართა, რა დროსაც იუსტიციის მინისტრმა, ანრი ოხანაშვილმა განაცხადა: „საქართველოს ხელისუფლებამ სტრასბურგში მორიგი გამარჯვება მოიპოვა, რომლითაც ოკუპირებულ აფხაზეთში საკუთრების უფლების დარღვევაზე სრული პასუხისმგებლობა რუსეთს დაეკისრა“.