“ იმდენად აბსურდული განმარტებები იყო ამ სიაში, რომ ცოტა უპასუხისმგებლო და ღიმილის მომგვრელია ეს ყველაფერი”

საპარლამენტო უმრავლესობის წევრი ზვიად შალამბერიძე სანქციებთან დაკავშირებით, ლიეტუვას და ესტონეთის გადაწყვეტილებას ეხმაურება.

მისი თქმით, განმარტება, რომელიც სანქციებს ახლავს არასერიოზული და ღიმილის მომგვრელია.

„სამწუხარო ის არის, რომ რეალურად, პირველ შემთხვევაში, როდესაც უკრაინიდან იყო სანქცირება მაშინ განმარტება არ მოჰყოლია. თუმცა ლიეტუვას შემთხვევაში განმარტება ჰქონდა მაგრამ ვისურვებდი, რომ ასეთ განმარტებას საერთოდ არ განმარტო. იმიტომ, რომ იმდენად აბსურდული განმარტებები იყო ამ სიაში, ვფიქრობ, რომ ცოტა უპასუხისმგებლო და მართლაც ღიმილის მომგვრელია ეს ყველაფერი“, – განაცხადა ზვიად შალამბერიძემ.

ცნობისთვის, უზენაესი სასამართლოს სისხლის სამართლის საქმეთა პალატის თავმჯდომარე, შალვა თადუმაძე, გეგმავს სანქცირების გამო, ადამიანის უფლებათა ევროპულ სასამართლოს მიმართოს. თადუმაძემ საგარეო საქმეთა მინისტრს, მაკა ბოჭორიშვილს წერილი მისწერა, საერთაშორისო სამართლით დადგენილი წესის თანახმად, საგარეო უწყებამ მოიწვიოს ლიეტუვის რესპუბლიკის ელჩი და უზრუნველყოს ამ შეხვედრაზე მისი დასწრება, რათა ოფიციალური პირისგან მიიღოს განმარტება, თუ რის საფუძველზე გადაწყვიტა ლიეტუვის საგარეო საქმეთა სამინისტრომ მისი მოხსენიება დასანქცირებულთა სიაში, როგორც „ქართველი პოლიტიკოსის“.