ირაკლი სესიაშვილი: “ნაციონალური მოძრაობის“ უმცირესობას უნდა, რომ სუს-ის ანგარიშის მოსმენა პოლიტიკური მიზნებისთვის გამოიყენოს

„ნაციონალური მოძრაობის“ უმცირესობას უნდა, რომ ამ ანგარიშის მოსმენა პოლიტიკური მიზნებისთვის გამოიყენოს”, – ამის შესახებ თავდაცვისა და უშიშროების კომიტეტის თავმჯდომარემ, ირაკლი სესიაშვილმა სუს-ის ხელმძღვანელის ვახტანგ გომელაურის წლიური ანგარიშის წარდგენის შემდეგ კითხვა-პასუხის ფორმატის დახურვასთან დაკავშირებით განაცხადა.
​როგორც სესიაშვილმა აღნიშნა, საერთაშორისო პრაქტიკით, უსაფრთხოების სამსახურის ხელმძღვანელებს დახურულ რეჟიმში უსმენენ.
„რეალურად მათი მიზანი არის, რომ ანგარიში პოლიტიკურ ნაწილში გადაიყვანონ, თუმცა, კოლეგებო, თუკი ღია რეჟიმში გავაგრძელებთ მუშაობას, ვახტანგ გომელაურს უბრალოდ არ ექნება შესაძლებლობა, შეუზღუდავად, სრულფასოვნად გასცეს ყველა კითხვას პასუხი. ძალიან მარტივი ახსნა აქვს ამას – ბატონ ვახტანგს სამსახურებრივად აქვს პასუხისმგებლობა, რომ თითოეული სიტყვის უკან იფიქროს და ქვეყნის უსაფრთხოების ინტერესები დაიცვას. საერთაშორისო პრაქტიკა არის, რომ უსაფრთხოების სამსახურის ხელმძღვანელებს ყველგან დახურულ რეჟიმში უსმენენ, რამდენადაც შინაარსი არის მთავარი. ჩვენ კომიტეტზე მივიღეთ გადაწყვეტილება და კითხვა-პასუხი დახურულ კარს მიღმა მიმდინარეობდა, რამაც ნაყოფიერი შედეგი მოიტანა. კიდევ ერთხელ მინდა დაგიდასტუროთ, რომ დახურულ კარს მიღმა მაქსიმალურად შევძელით უსაფრთხოების გარემოს ანალიზი და ასევე, ჩამოგვიყალიბდა შესაბამისი შეხედულებები“, – განაცხადა სესიაშვილმა.
​შეგახსენებთ, რომ დეპუტატებმა სუს-ის ხელმძღვანელის გამოსვლის შემდეგ კითხვა-პასუხის რეჟიმის დახურვას კენჭი უყარეს.