მამუკა არეშიძე: სუს-ის ანგარიშში ყველა ის მიმართულებაა მოცემული, რომელიც ქვეყნისთვის მნიშვნელოვანია

მამუკა არეშიძე: სუს-ის ანგარიშში ყველა ის მიმართულებაა მოცემული, რომელიც ქვეყნისთვის მნიშვნელოვანია დოკუმენტი, რომელიც სახელმწიფო უსაფრთხოების სამსახურის უფროსმა პარლამენტში წარადგინა, ვფიქრობ, საყურადღებოა და კარგად ჩანს სახიფათო მიმართულებები, უსაფრთხოების სამსახურის ინფორმირებულობა და მუშაობა, – ასე შეაფასა ექსპერტმა მამუკა არეშიძემ სახელმწიფო უსაფრთხოების სამსახურის უფროსის ვახტანგ გომელაურის მიერ პარლამენტში წარდგენილი სუს-ის მიერ გაწეული საქმიანობის ყოველწლიური ანგარიში.
როგორც არეშიძემ „კვირასთან“ საუბრისას განაცხადა, სუს-ის ანგარიშში ყველა ის მიმართულებაა მოცემული, რომელიც ქვეყნისთვის მნიშვნელოვანია. ექსპერტს გარკვეული შენიშვნებიც აქვს.
„დოკუმენტი, რომელიც სახელმწიფო უსაფრთხოების სამსახურის უფროსმა პარლამენტში წარადგინა, ვფიქრობ საყურადღებოა. თუნდაც იმით, რომ მასში ყველა ის მიმართულება იყო მოცემული, რომელიც მნიშვნელოვანია ქვეყნის უსაფრთხოებისთვის. რაც შეეხება თვითონ შინაარსს, მე, ერთი მხრივ, არ გამიკვირდება, რომ საზოგადოების ნაწილი უკმაყოფილო დარჩეს, იმიტომ რომ, სიღრმისეული ნაწილი აკლდა. უფრო მეტის თქმაც შეიძლებოდა, იმიტომ რომ, ჩემი პრაქტიკიდან გამომდინარე, ზოგიერთი საკითხები სიღრმისეულად ვიცი. მეორე მხრივ, ყველაფერს ვერ იტყვი ბუნებრივია, იმიტომ, რომ ჩვენი მოწინააღმდეგე არ იყოს ინფორმირებული.
დოკუმენტში კარგად ჩანს სახიფათო მიმართულებები, როგორიცაა იარაღით უკანონო ვაჭრობა, ნარკოტიკების სატრანზიტო დერეფანი, რომელიც საქართველოს ტერიტორიაზე გადის სამწუხაროდ და რაც ძალიან მნიშვნელოვანია, საერთაშორისო ტერორიზმთან ბრძოლა. ასევე ჩანს უსაფრთხოების სამსახურის ინფორმირებულობა და მუშაობა. საქმეში ჩახედული მკითხველი დაინახავს ამ სიტყვების მიღმა რა არის. სხვა შემთხვევაში შესაძლებელია, ეს არ გამოჩნდეს. უსაფრთხოების პრინციპებიდან გამომდინარე, ყველაფრის თქმა არ არის სწორი“, – განაცხადა „კვირასთან“ საუბრისას მამუკა არეშიძემ.