ბოლო პერიოდში სხვადასხვა მხრიდან ქვეყნის საშინაო საქმეებში ჩარევის არაერთი მცდელობის მოწმენი გავხდით, მაგრამ ჩვენი საზოგადოებები, სახელმწიფოები საკმაოდ მდგრადები არიან მსგავს ნაბიჯებთან გასამკლავებლად, – ამის შესახებ საქართველოს საგარეო საქმეთა მინისტრმა, მაკა ბოჭორიშვილმა აზერბაიჯანის რესპუბლიკის საგარეო საქმეთა მინისტრთან, ჯეიჰუნ ბაირამოვთან ერთობლივ პრესკონფერენციაზე განაცხადა.
მაკა ბოჭორიშვილს კითხვა დაუსვეს: „მოგეხსენებათ, დასავლეთის ქვეყნებმა შეშფოთება გამოთქვეს საქართველოში ახლახან ამოქმედებულ „უცხოური გავლენის გამჭირვალობის შესახებ“ კანონთან დაკავშირებით და ეს პროცესი დაგვამახსოვრდა, როგორც ქვეყნის საშინაო საქმეებში ჩარევის მცდელობა. აზებაიჯანის შემთხვევაში, ასევე ადამიანის უფლებების საფარქვეშ ამგვარი ჩარევის მცდელობების გათვალისწინებით, არის თუ არა დაგეგმილი რაიმე სახის თანამშრომლობა არსებული საერთო საფრთხეების წინააღმდეგ ბრძოლაში?“
„ბოლო პერიოდში არაერთი მცდელობის მოწმენი გავხდით, როდესაც სხვადასხვა მხრიდან ხდება ქვეყნის საშინაო საქმეებში ჩარევის მცდელობები, მაგრამ ჩვენი საზოგადოებები, სახელმწიფოები საკმაოდ მდგრადები არიან მსგავს ნაბიჯებთან გასამკლავებლად. მართალია, ეს ჩვენ წინაშე გამოწვევებს ზრდის ხოლმე, თუმცა ისიც უნდა ვთქვათ, რომ ჩვენი სახელმწიფოები, ჩვენი ძლიერი სახელმწიფო ინსტიტუტები კარგად უმკლავდებიან გამოწვევებს, რომლებიც ხშირად სხვადასხვა მხრის ჩარევებიდან გამომდინარეობს. რა თქმა უნდა, ჩვენთვის, პირველ რიგში, ძალიან მნიშვნელოვანია ურთიერთპატივისცემა. საქართველოსა და აზერბაიჯანს აქვს არაჩვეულებრივი ისტორია ერთმანეთის პატივისცემის, საუკეთესო თანამშრომლობის, მხარში დგომის. თანამშრომლობა, პარტნიორობა მიმართულია და ყოველთვის მიმართული იქნება ჩვენი შესაძლებლობების უკეთ და მხოლოდ პოზიტიურად გამოყენებისთვის, რათა ჩვენ ვიყოთ სასარგებლო, პირველ რიგში, ჩვენი ხალხებისთვის და ფართო რეგიონისთვის“, – განაცხადა მაკა ბოჭორიშვილმა.