დღეს გაიმართა საქართველო-აზერბაიჯანის თანამშრომლობის კომისიის მე-10 სხდომა, რომელიც იყო ძალიან ნაყოფიერი და პროდუქტიული, – ამის შესახებ საქართველოს პრემიერ-მინისტრმა ირაკლი კობახიძემ აზერბაიჯანის პრეზიდენტ ილჰამ ალიევთან პირისპირ შეხვედრის შემდეგ, ერთობლივი განცხადებების დროს აღნიშნა.
მთავრობის მეთაურმა მადლობა გადაუხადა აზერბაიჯანულ მხარეს კომისიის შეხვედრის ძალიან მაღალ დონეზე ორგანიზებისა და დელეგაციის მასპინძლობისათვის.
„მინდა მადლობა გადავუხადო აზერბაიჯანულ მხარეს კომისიის შეხვედრის ძალიან მაღალ დონეზე ორგანიზებისათვის, ჩვენი დელეგაციის მაღალ დონეზე მასპინძლობისათვის. ეს კომისია შესანიშნავი ფორმატია, რომლის ფარგლებშიც ჩვენ შეგვიძლია ვიმსჯელოთ ორმხრივი თანამშრომლობის შემდგომ განვითარებასთან დაკავშირებით. ჩვენს პარტნიორობასა და თანამშრომლობას აქვს ძალიან მყარი საფუძველი და ეს არის ტრადიციული, ისტორიული მეგობრობა ჩვენს ხალხებს შორის. სწორედ, ამ ისტორიულ მეგობრობას ეფუძნება სტრატეგიული პარტნიორობა საქართველოსა და აზერბაიჯანს შორის. დარწმუნებული ვარ, სამომავლოდაც ჩვენი პარტნიორობა ამ სულისკვეთებითა და ამ საფუძვლით გაგრძელდება.
ძალიან მნიშვნელოვანია, რომ ჩვენ პატივს ვცემთ ერთმანეთის სტრატეგიულ ეროვნულ ინტერესებს, ერთმანეთის სუვერენიტეტს, ტერიტორიულ მთლიანობას და ამ თვალსაზრისით ძალიან მყარი და ურყევი მხარდაჭერისთვის აზერბაიჯანის მხარეს და პირადად პრეზიდენტ ილჰამ ალიევს განსაკუთრებული მადლობა მინდა გადავუხადო,“- განაცხადა პრემიერმა.