ყოფილი პარლამენტარი თამაზ მეჭიაური „რეპორტიორის” პრესკლუბში გამართულ ბრიფინგზე თურქეთში ჩატარებულ რეფერენდუმს გამოეხმაურა.
„თურქეთის რეფერენდუმი მიზნად ისახავს ხელისუფლების პოზიციების გამყარებას. გამომდინარე აქედან, უნდა ველოდოთ ალბათ იმას, რომ თურქეთის პოლიტიკა კიდევ უფრო გამკაცრდება როგორც დასავლეთის, აგრეთვე, ნებისმიერი მიმართულებით და უპირველესად, თურქეთის ინტერესებზე იქნება მორგებული. გამომდინარე იქიდან, რომ საქართველო არის თურქეთის მეზობელი ქვეყანა, არ შეიძლება, იქ მიმდინარე მოვლენებმა ასახვა არ პოვოს საქართველო-თურქეთის ურთიერთობებზე. კონკრეტიკისაგან თავს შევიკავებ, თუმცა, რაიმე ისეთ გაგრძელებას, რომელიც საქართველოს ინტერესებზე იქნება მორგებული, არ მოველი. გამომდინარე იქიდან, რომ თურქეთი არის NATO-ს წევრი ქვეყანა, მეორე მხრივ, თურქეთი ღიად უპირისპირდება დასავლეთს. ამიტომ, როდესაც თურქეთი დასავლეთის მნიშვნელოვან მოთამაშეებს თითს უქნევს, არ შეიძლება, რომ საქართველოს მიმართაც არ ჰქონდეს გარკვეული ინტერესი, რომელიც არაერთხელ, ირიბად და ზოგჯერ პირდაპირაც გამოუთქვამთ, კერძოდ, აჭარასთან მიმართებაში. ასე რომ, ყველაფერს სიფრთხილით უნდა მივუდგეთ. როცა ერთი მხრივ, რუსეთი თანდათან იკავებს ცხინვალის რეგიონს, აფხაზეთი ფაქტობრივად შეჰყავს თავის შემადგენლობაში, ამ შემთხვევაში თურქეთის ერთ-ერთი შემაკავებელი იყო რუსეთი. მაშინ, როდესაც ეს შემაკავებელიც მცოცავი ანექსიით იკავებს ჩვენი ტერიტორიის ჩრდილო ნაწილს, არ არის გამორიცხული, რომ სამხრეთიდანაც იმავეს მოველოდეთ. ამიტომ, იმის იმედი, რომ თურქეთი დაგვეხმარება რუსეთის დამარცხებაში, ან აშშ თურქეთს დაეხმარება და ორივე ერთად – ჩვენ, ილუზიაა”, – განაცხადა თამაზ მეჭიაურმა.