“მთავარსარდლის ფუნქცია პრეზიდენტს რჩება და აქ არანაირი ცვლილება არ ხდება”

პრეზიდენტს მთავარსარდლის ფუნქცია რჩება და აქ არანაირი ცვლილება არ ხდება, – ამის შესახებ  საპარლამენტო უმრავლესობის ლიდერმა არჩილ თალაკვაძემ განაცხადა.

„მთავარსარდლის ფუნქცია პრეზიდენტს რჩება და აქ არანაირი ცვლილება არ ხდება. რაც შეეხება დანარჩენ პრინციპებს, თავიდანვე განვაცხადეთ, რომ ახალი კონსტიტუცია საპარლამენტო მმართველობის მოდელთან შესაბამისობაში იქნება. საპარლამენტო მმართველობა მთელ ევროპაში იმას ნიშნავს, რომ აღმასრულებელი ფუნქციების დელეგირება პრემიერ-მინისტრზეა. პრაქტიკულად, ეს დღესაც ასეა და მომავალშიც საპარლამენტო მოდელის გაძლიერება მოხდება. პრეზიდენტს ყველა ის ძირითადი ფუნქცია უნარჩუნდება, რომელიც მას დღეს აქვს. თუნდაც, ეს არის მთავარსარდლის სტატუსი, გენერალურ შტაბთან მიმართებაში მისი ფუნქცია, საგარეო ურთიერთობებში წარმომადგენლობა და სხვა ფუნქციები. არ ვფიქრობ, რომ ჩვენ პათოსებით უნდა ვიმსჯელოთ იმაზე, რაც იურიდიულ დოკუმენტებთან მიმართებაშია“, – განაცხადა არჩილ თალაკვაძემ.