პირადად პრემიერ-მინისტრის ინიციატივით და მისი ჩართულობით, შეიძლება ითქვას, რომ დავიწყეთ მუშაობა უმაღლესი განათლების შემდგომი განვითარებისთვის. სწორედ ამ მიზნით შეიქმნა სამუშაო ჯგუფი, რომელიც იმუშავებს უმაღლესი განათლების რეფორმაზე საქართველოში. ძალიან დიდი და გრანდიოზული იდეები გვაქვს, – განაცხადა განათლების, მეცნიერებისა და ახალგაზრდობის მინისტრმა ალექსანდრე წულაძემ პრემიერ-მინისტრ ირაკლი კობახიძის ერთწლიანი მუშაობის შეჯამებისას გადაცემაში „იმედის კვირა“.
„ბოლო ერთი წლის განმავლობაში საქართველოში 30 ათასამდე მოსწავლემ დაიწყო სწავლა განახლებულ სასკოლო ინფრასტრუქტურაში. შესაბამისად, სრულად განახლდა, შეიძლება ითქვას, რომ თავიდან ბოლომდე აშენდა და რეაბილიტაცია განხორციელდა ასამდე სკოლის.
მეორე მხრივ, ჩვენს უმნიშვნელოვანეს დოკუმენტში, ზოგადი განათლების ეროვნულ მიზნებში ოცი წლის შემდეგ პირველად მოვახდინეთ განახლება. აღნიშნული დოკუმენტი გახდა ორიენტირებული პატრიოტული, ეროვნული სულისკვეთების და ზოგადად, საკაცობრიობო ღირებულებებზე“, – აღნიშნა ალექსანდრე წულაძემ.