ისრაელის სამხედროებმა დატოვეს ღაზის სექტორის გამყოფი ნეცარიმის დერეფანი. როგორც „ბიბისი“ წერს, ამგვარად ისრაელმა შეასრულა „ჰამასთან“ ცეცხლის შეწყვეტის შესახებ მიღწეული შეთანხმების ერთ-ერთი პირობა.
ისრაელელი სამხედროების გასვლის შემდეგ, ასობით პალესტინელმა გააგრძელა დაბრუნება ღაზის სექტორის ჩრდილოეთ ნაწილში.
ცნობისთვის, ისრაელის სამხედროების მიერ „ჰამასის“ მებრძოლების წინააღმდეგ წამოწყებული სახმელეთო ოპერაციის დროს, ანკლავის ჩრდილოეთ ნაწილში მდებარე რაიონები 700 ათასზე მეტმა ადამიანმა დატოვა.
ამასთან, ისრაელის არმიაში სამხედროების გაყვანის შესახებ ოფიციალური კომენტარი არ გაუკეთებიათ.
„ბიბისის“ მიხედვით, ნეცარიმის დერეფნიდან ისრაელელი სამხედროების გაყვანის შესახებ ვრცელდება ინფორმაცია, რომ ისრაელის დელეგაცია გაემგზავრება კატარში, სადაც ცეცხლის შეწყვეტის შესახებ შეთანხმების პირველ ეტაპთან დაკავშირებული ტექნიკური საკითხები განიხილება.
ცნობისთვის, შეთანხმების პირველი ეტაპი ექვს კვირაზეა გათვლილი. ის ცეცხლის სრულად შეწყვეტის დღიდან დაიწყო, რის შემდეგაც ღაზიდან იძულებით გადაადგილებულმა პირებმა სახლებში დაბრუნება დაიწყეს. ამის პარალელურად, „ჰამასმა“ ისრაელელი მძევლების გათავისუფლების პროცესი დაიწყო, რომლებსაც ისრაელის ციხეებში მყოფ პალესტინელ პატიმრებში ცვლიან.
შეთანხმებისამებრ მეორე ეტაპზე მოსალოდნელია რთული მოლაპარაკებები, რომელთა ფარგლებშიც ცეცხლის შეწყვეტა მუდმივი უნდა გახდეს. პალესტინელები ასევე დაჟინებით ითხოვენ, რომ ისრაელმა სრულად გაიყვანოს სამხედროები ღაზის სექტორიდან.