“დღეს ჩვენ გავხდით ისეთი მოვლენის მომსწრეები, რასაც ბევრი ნამდვილად ვერ წარმოიდგენდა”

დღეს ჩვენ გავხდით ისეთი მოვლენის მომსწრეები, რასაც ბევრი ნამდვილად ვერ წარმოიდგენდა, – ამის შესახებ ფრაქცია ქართული ოცნების თავმჯდომარემ მამუკა მდინარაძემ განაცხადა.
მისი თქმით, 14 პარტია “ადგილობრივი თვითმმართველობის შესახებ” კოდექსში და “თბილისის შესახებ” კანონში ცვლილებებს ითხოვს.
”პარლამენტის ბიუროს მიმდინარეობისას დღეს ჩვენ გავხდით ისეთი მოვლენის მომსწრეები, რასაც ბევრი ნამდვილად ვერ წარმოიდგენდა. 14 პარტია ითხოვს ცვლილებებს “ადგილობრივი თვითმმართველობის შესახებ” კოდექსში და “თბილისის შესახებ” კანონში. დავუშვათ, რომ პირველ შემთხვევაში მექანიკურ შეცდომას აქვს ადგილი. მეორე შემთხვევაში – “თბილისის შესახებ” კანონი აღარ არსებობს და ის ძალადაკარგულად არის გამოცხადებული 2014 წლიდან. თქვენ შეგიძლიათ ნახოთ, რომელ პარტიებზეა საუბარი. ეს სწორედ ის პარტიებია, რომლებიც გამოდიან ხოლმე და ჭკვიანი სახეებით აპროტესტებენ, ბოიკოტს უცხადებენ საკონსტიტუციო ცვლილებებს, გვაკრიტიკებენ ჩვენ და ა.შ. პოლიტიკოსებისთვის ამისი არცოდნა ნამდვილად სირცხვილია, განსაკუთრებით მაშინ, როდესაც ირწმუნები, რომ ამ ძალადაკარგულ კანონში რაღაც შესაცვლელია. ვფიქრობ, ამაზე მეტი კომენტარი მომხდარზე ზედმეტია. დარწმუნებული ვარ, საზოგადოება კიდევ ერთხელ სწორ დასკვნებს გააკეთებს”, – განაცხადა მამუკა მდინარაძემ.