საქართველო ერთი წლით ენერგეტიკული გაერთიანების თავმჯდომარე ქვეყანა იქნება, – ამის შესახებ ოფიციალური განცხადება ავსტრიაში, ქალაქ ვენაში გამართულ მიღებაზე გაკეთდა, რომელსაც საქართველოს დელეგაციასთან ერთად ენერგეტიკული გაერთიანების წევრი ქვეყნების წარმომადგენლები ესწრებოდნენ.
საქართველო ენერგეტიკული გაერთიანების წევრი 2017 წელს გახდა და რეგლამენტის შესაბამისად, 2025 წელს პირველად არის ორგანიზაციის თავმჯდომარე.
ენერგეტიკული გაერთიანება არის საერთაშორისო ორგანიზაცია, რომელიც უზრუნველყოფს ევროკავშირისა და წევრი ქვეყნების ურთიერთთანამშრომლობას ენერგეტიკული უსაფრთხოების, ენერგეტიკული მდგრადობისა და გარემოსდაცვითი მიზნების მისაღწევად.
ეკონომიკის სამინისტროს ცნობით, ენერგეტიკულ გაერთიანებას ჰყავს ხელშეკრულების მონაწილე ცხრა მხარე – საქართველო, ალბანეთი, ბოსნია და ჰერცეგოვინა, კოსოვო, ჩრდილოეთ მაკედონია, მოლდოვა, მონტენეგრო, სერბეთი და უკრაინა.
„აღსანიშნავია, რომ ევროკავშირი ასევე არის ენერგეტიკული გაერთიანების ხელშეკრულების მხარე და ორგანიზაციის მუდმივი ვიცე-პრეზიდენტი. საქართველოს ენერგეტიკული გაერთიანების წევრობა და თავმჯდომარეობა კიდევ ერთხელ ადასტურებს საქართველოს ერთგულებას ევროკავშირთან ენერგეტიკული თანამშრომლობის გაღრმავების, მდგრადი ენერგეტიკული პოლიტიკის ხელშეწყობისა და ენერგეტიკული უსაფრთხოების გაძლიერების მიმართ“, – ნათქვამია გავრცელებულ ინფორმაციაში.
ენერგეტიკული გაერთიანების დირექტორი არტურ ლორკოვსკი აცხადებს, რომ ბოლო სამი წლის განმავლობაში ეკონომიკის სამინისტროს ხელმძღვანელობით საქართველომ უდიდეს პროგრესს მიაღწია.
„დღეს ვენაში ვზეიმობთ საქართველოს თავმჯდომარეობის დაწყებას და უნდა ვთქვა, რომ საქართველო ძალიან კარგად მოემზადა ამ დღისთვის. ბოლო სამი წლის განმავლობაში ეკონომიკის სამინისტროს ხელმძღვანელობით საქართველომ უდიდეს პროგრესს მიაღწია იმ ვალდებულებების შესრულების კუთხით, რაც ქვეყანამ აიღო ენერგეტიკულ გაერთიანებაში გაწევრიანებისას. ამის გამო, დღეს საქართველო ერთ-ერთი წამყვანი შემსრულებელია ენერგეტიკულ გაერთიანებაში საკანონმდებლო ჩარჩოს დანერგვის თვალსაზრისით. პრეზიდენტობა დამატებითი ვალდებულება და პასუხისმგებლობაა, რადგან პასუხისმგებლობა ეხება მთლიანად პროცესის წარმართვას გაერთიანების ქვეყნებში. ჩვენ გვჯერა, რომ საქართველოს აქვს უნარი იყოს ლიდერი და სამართლიანი მოთამაშე, რაც მიგვიყვანს წარმატებამდე 2025 წელს. გასაკეთებელი ნამდვილად ბევრია, როდესაც საქმე ეხება ენერგეტიკული კავშირის ქვეყნებისა და ევროკავშირის ბაზრების ინტეგრაციას და საქართველოს ლიდერული უნარები და სამართლიანი მოთამაშეობა ნამდვილად გვჭირდება განსაკუთრებით ახლა, როდესაც ენერგეტიკული კავშირისთვის რთული პერიოდია იმ დროს, როდესაც უკრაინისა და მოლდოვის ბაზრებზე უარყოფით გავლენას ახდენს რუსეთის შეჭრა და თანმხლები შედეგები“, – განაცხადა ლორკოვსკიმ.
