სტიქიასთან ბრძოლის უწყვეტი პროცესი გრძელდება. გურიაში 24 საათიან რეჟიმში მიმდინარეობს სალიკვიდაციო სამუშაო.
ოზურგეთის მუნიციპალიტეტში საავტომობილო გზების 80% თოვლისგან გაწმენდილია, რაც შეეხება კომუნალური სერვისების მიწოდებას, გურიის რეგიონში დამატებით, 5 ათასამდე აბონენტს ელექტროენერგიის მიწოდება აღუდგა.
პრემიერ-მინისტრის ხელმძღვანელობით მოქმედი საკოორდინაციო შტაბის მიერ მიღებული გადაწყვეტილების შესაბამისად, გურიის რეგიონში, დიდთოვლობით დაზარალებული მოსახლეობის დასახმარებლად, 140 ტონა სურსათი და პირველადი მოხმარების პროდუქტები ჩაიტანეს.
როგორც სახელმწიფო რწმუნებულმა გურიის მხარეში გიორგი ურუშაძემ აღნიშნა, სურსათი გურიის მხარის სამივე მუნიციპალიტეტში განაწილდება და მოსახლეობას გადაეცემა.
„მობილიზებულია ჰუმანიტარული ტვირთი და ეს მობილიზაცია გრძელდება. ასევე, სატყეო სააგენტოს მიერ მობილიზებულია სათბობი შეშა. არც ერთი ჩვენი მოქალაქე არ დარჩება ყურადღების მიღმა. გვაქვს ძალიან დიდი პროგრესი, როგორც ელექტროენერგიის, ასევე, გაზმომარაგების აღდგენის კუთხით. ტვირთის მიწოდება, სადაც მანქანით გადაადგილება არის შესაძლებელი ხდება სატრანსპორტო საშუალებებით. ასევე, ტვირთი მიეწოდება ისეთ ადგილებში, სადაც ჯერჯერობით მანქანით გადაადგილება შეუძლებელია სპეციალური თოვლმავალი საშუალებებით. არის რამდენიმე სოფელი, ძირითადად მაღალმთიანი სოფლები, სადაც ჯერჯერობით სატრანსპორტო საშუალებებით გადაადგილება არის შეუძლებელი თუმცა იქაც აქტიურად მიმდინარეობს გაწმენდითი სამუშაოები“, – განაცხადა გიორგი ურუშაძემ.