იმ შემთხვევაში, თუ ჯაშუშობაში მხილებული იქნება საქართველოს მოქალაქე, იგი პასუხს აგებს ღალატის მუხლით, ხოლო იმ შემთხვევაში, როდესაც უცხო ქვეყნის მოქალაქე იქნება მხილებული ჯაშუშობაში, ის სისხლის სამართლის კოდექსის 314-ე – ჯაშუშობის მუხლით აგებს პასუხს, – განაცხადა პარლამენტის თავდაცვისა და უშიშროების კომიტეტის თავმჯდომარემ, ალექსანდრე ტაბატაძემ.
„დანარჩენ შემთხვევებში, როგორიცაა სახელმწიფო საიდუმლოების დარღვევა, უცხო ქვეყნის სპეცსამსახურებში შესვლა, ანტიკონსტიტუციური ხელშეკრულებების მომზადება, მოლაპარაკება, საგარეო ურთიერთობების, სახელმწიფო უსაფრთხოების დარღვევა და ა.შ. ეს ყველაფერი მოექცევა ერთდროულად ღალატის მუხლში“, – აღნიშნავს ტაბატაძე.
„სისხლის სამართლის კოდექსში“ დაგეგმილი ცვლილებები იურიდიული კომიტეტის წევრებმა განიხილეს. კანონმდებლობაში ისევ ჩნდება სამშობლოს ღალატის მუხლი. ეს მუხლი „ნაციონალურმა მოძრაობამ“ 2007 წელს გააუქმა.