სოციალურ ქსელში მიმდინარეობდა მთელი კამპანია, რომ არსებობს ფონდები, რომელთა მიერ ჯარიმების გადახდა მოხდებოდა. ადამიანებს იმას კი არ ეუბნებოდნენ, კანონი უნდა იყოს დაცულიო, არამედ კანონი დაარღვიეთ და ამ ყველაფერში ფულს გადავიხდითო, – ამის შესახებ პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ განაცხადა.
გორდულაძის თქმით, ჯარიმის დანიშნულებაა სამომავლოდ დანაშაულის პრევენცია, რაც ვერ მოხდება, თუკი თანხის გადახდაზე პასუხისმგებლობას კონკრეტული ფონდები იღებენ. არჩილ გორდულაძის განმარტებით, საინტერესოა ისიც, საიდან იღებენ თანხებს აღნიშნული ფონდები.
„ნაცაგენტურის“ წარმომადგენელს, სალომე ზურაბიშვილს ერთ-ერთი განცხადების დროს წამოსცდა – არ იდარდოთ, არსებობს შესაბამისი ფონდები, რომელთაც ჯარიმების გადახდა შეუძლიათო. ეს განცხადება ხომ არ დაგვვიწყებია და მოგვჩვენებია? სოციალურ ქსელში მთელი კამპანია მიმდინარეობდა, რომ არსებობს ფონდები, რომელთა მიერ ჯარიმების გადახდა მოხდებოდა. ადამიანებს იმას კი არ ეუბნებოდნენ, კანონი და ყველას უფლება უნდა იყოს დაცულიო, არამედ კანონი დაარღვიეთ და ამ ყველაფერში ფულს გადავიხდითო. ეს პირდაპირ სახელმწიფოს ჩამოშლის მცდელობაა და აღკვეთილი უნდა იყოს.
ჯარიმას და სანქციას აქვს ერთადერთი დანიშნულება, რომ გადაცდომის და დანაშაულის პრევენცია მოახდინოს და როგორ უნდა მოახდინოს პრევენცია, როცა თანხის გადახდაზე პასუხისმგებლობას კონკრეტული ადამიანები და ფონდები იღებენ? საკითხავია ისიც, ეს ფონდები როგორ ივსება და როგორ რიცხავენ დონორები თანხებს. ისინი კანონმდებლობის დარღვევას პირდაპირ აფინანსებდნენ და იმ ძალადობას ახალისებდნენ, რომელიც დედაქალაქის ქუჩებში იყო. ახლა განცხადებებს იმისთვის აკეთებენ, რომ როგორმე, პოლიტიკას რეალური დამნაშავეები ამოეფარონ. ეს არაერთხელ გაუკეთებიათ. ჯაფარიძე-ხაზარაძე პოლიტიკაში მოვიდნენ, რათა დავალებები შეესრულებინათ და ამავე დროს, პოლიტიკის სარჩულით შესაბამისი პასუხისმგებლობა აიცილებინათ“, – განაცხადა არჩილ გორდულაძემ.