„ნაც სექტა“ ყველანაირ წმინდას, ყველანაირ ტერმინს, ყველანაირ დეფინიციას აზრს უკარგავს. მათ შორის, ქველმოქმედებასაც, – განუცხადა „ქრონიკას“ იურიდიულ საკითხთა საპარლამენტო კომიტეტის თავმჯდომარე არჩილ გორდულაძემ.
მისივე თქმით, ადამიანები ქველმოქმედებაზე საუბრობენ იმ მოტივით, რომ თავიანთ ფონდებთან დაკავშირებული ისრები გადაიტანონ სულ სხვა მიმართულებით.
„ფაქტია ერთი რამ, ამ ადამიანების მიზანი მხოლოდ და მხოლოდ იყო, რომ ჩამოეშალათ სახელმწიფო, არ უნდა ემუშავა კანონს, არ უნდა ემოქმედა კანონიერებას. ფაქტია, რომ ეს ადამიანები აფინანსებდნენ სამართალდარღვევებს.
ნაც კლასტერზე როდესაც ჩვენ ვსაუბრობთ, არ უნდა დაგვავიწყდეს ქალბატონი სალომე ზურაბიშვილი, რომელსაც წამოსცდა პირდაპირ ბრიფინგის დროს, რომ არა უშავს კვლავ არსებობენ ფონდები, რითაც დაფინანსდება ჯარიმების გადახდაო“, – აღნიშნა არჩილ გორდულაძემ.
ცნობისთვის, საქართველოს პროკურატურამ რამდენიმე ფონდის საბანკო ანგარიშების დაყადაღებასთან დაკავშირებით განცხადება გაავრცელა. უწყების ცნობით, ე.წ. „ფონდები“, შეგროვებული ფინანსების ძირითად ნაწილს ახმარენ ჯგუფური ძალადობის ორგანიზების და მასში მონაწილეობის ფაქტზე ბრალდებულ პირთა და მათი ოჯახის წევრთა ფინანსურ უზრუნველყოფას და ამით გარდა ძალადობრივი ქმედების დაფინანსებისა ქმნიან მატერიალური სარგებლის მიღების მიზნით უკანონო ქმედებებში პირთა ჩართვის წამახალისებელ საფუძვლებს.