საქართველოს სპორტის სამინისტროს მხარდაჭერით თბილისის „გრანდ სლემი” მიმდინარეობს. ქართველმა ძიუდოისტებმა ტურნირის მეორე დღესაც წარმატებით იასპარეზეს და სამი მედალი: ერთი ოქრო და ორი ბრინჯაო მოიპოვეს.
„გრანდ სლემის“ ასპარეზობებს სპორტის მინისტრი შალვა გოგოლაძე პირველ მოადგილე ირაკლი მეძმარიაშვილთან ერთად დაესწრო. შალვა გოგოლაძემ -73 კილოგრამ წონით კატეგორიაში გამარჯვებული სპორტსმენები დააჯილდოვა. „გრანდ სლემს“ ესწრებოდა ლეგენდარული იაპონელი ძიუდოისტი შოჰეი ონო.
ლაშა შავდათუაშვილმა (-73 კგ) ტურნირის ჩემპიონობა მესამედ იზეიმა, -81 კგ წონით კატეგორიაში ირაკლი ბეროშვილმა და ზაურ დვალაშვილმა კი ბრინჯაოს მედლები მოიპოვეს.
ტურნირის პირველ დღეს ეთერ ლიპარტელიანმა (-57 კგ) ოქროს მედალი ზედიზედ მეორედ მოიპოვა, ამავე წონაში ნინო ლოლაძემ ბრინჯაოს მედალი დაისაკუთრა, თემურ ნოზაძემ (-66 კგ) კი ვერცხლის მედალი დაიმსახურა. ამ ეტაპზე საქართველოს ნაკრების ანგარიშზე ექვსი – ორი ოქროს, ერთი ვერცხლისა და სამი ბრინჯაოს მედალია.
თბილისის „გრანდ სლემის” მესამე დღეს -90 კგ წონით კატეგორიაში ლუკა მაისურაძე, გიორგი ჯაბნიაშვილი, ნიკა ხარაზიშვილი და სოსო ებილაშვილი იასპარეზებენ, -100 კგ წონით კატეგორიაში კი მედლების მოპოვებას შეეცდებიან ილია სულამანიძე, ნიკოლოზ ზაალიშვილი, იმედა გოგოლაძე და ისლამ წინწალაშვილი. რაც შეეხება +100 კგ წონით კატეგორიას, აქ მედლებისთვის გურამ თუშიშვილი, საბა ინანეიშვილი, ირაკლი დემეტრაშვილი და გაბო მუკბანიანი იასპარეზებენ. გოგონებს შორის მედლის მოპოვებას სოფიო სომხიშვილი (+78 კგ) შეეცდება.