როცა ვუსმენთ დაზარალებულებს შოკს განვიცდით თუ რამხელა ცინიზმი იყო იმ ხელისუფლების პირობებში და ამ უსამართლობის შემადგენელი ნაწილი იყვნენ მამუკა ხაზარაძე და ბადრი ჯაფარიძე, – განაცხადა პარლამენტის ვიცე-სპიკერმა სოზარ სუბარმა საგამოძიებო კომისიის სხდომასთან დაკავშირებით.
მისი თქმით, „ნაცმოძრაობა“ ბიზნესის რეკეტთან დაკავშირებით მოქმედებდა ერთიანი სქემით და მასში, ხშირ შემთხვევაში მონაწილეობდნენ მამუკა ხაზარაძე და ბადრი ჯაფარიძე.
„რომ ვეცნობი ამ მასალებს, კიდევ ერთხელ თვალწინ ცოცხლდება ის უკანონობის, ძალადობის, საკუთარი მოქალაქეების მიმართ ცინიზმის მთელი ეპოქა, რასაც „ნაცმოძრაობის“ დროს ჰქონდა ადგილი. ძალიან ბევრ ამ საქმეში იკვეთება მამუკა ხაზარაძის, ბადრი ჯაფარიძის და ასეთი, ვითომ ხელისუფლებაში არ მყოფი გარკვეული პირების საქმეები, რომლებიც ამ დროს სინამდვილეში ჩართულები იყვნენ ხელისუფლების ამ ძალადობრივ მექანიზმების აღსრულებაში. ერთ-ერთი ასეთი საქმე არის „მაგნატის“ საქმე, რომელსაც როცა ვეცნობით საქმის მასალებს, რომელზეც უკვე სასამართლოს გამამართლებელი განაჩენი არსებობს, როცა ვუსმენთ იმ ადამიანებს, რომლებიც დაზარალებულები იყვნენ, კიდევ ერთხელ შოკს განვიცდით თუ რამხელა ცინიზმი და რამხელა უსამართლობა იყო იმ ხელისუფლების პირობებში და ამ უსამართლობის შემადგენელი ნაწილი იყვნენ მამუკა ხაზარაძე და ბადრი ჯაფარიძე და ეს ვლინდება ძალიან ბევრ საქმეში, როცა ხელისუფლება მათი მეშვეობით ადამიანებს ატერორებდა, ადამიანებს ართმევდა ბიზნესს და ეს ბიზნესები ზოგჯერ რჩებოდა ხაზარაძე-ჯაფარიძის ხელში, ზოგჯერ გადადიოდა მაგალითად, ამ კონკრეტულ შემთხვევაში კეზერაშვილის ხელში. იკვეთება, რომ არსებობდა ერთიანი კარგად შემუშავებული სქემა, სადაც ხელისუფლების ხელში იარაღს წარმოადგენდა ეს ორი ადამიანი. უნდა მოვიდნენ წესით, პატივი უნდა სცენ საქართველოს პარლამენტს, საქართველოს კონსტიტუციას. მგონია, რომ მოვლენ და გასცემენ პასუხს ამ კითხვებს. თუ არ მოვლენ არსებობს შესაბამისი მექანიზმები არსებულ სისხლის სამართლის კოდექსში“, – განაცხადა სოზარ სუბარმა.
ცნობისთვის, ხვალ 2003-12 წლებში მოქმედი რეჟიმისა და რეჟიმის პოლიტიკური თანამდებობის პირთა საქმიანობის შემსწავლელი საქართველოს პარლამენტის დროებითი საგამოძიებო კომისიის მეოთხე სხდომა გაიმართება. დღის წესრიგშია ბიზნესზე ზეწოლის ერთ-ერთი საქმის განხილვა. დაბარებულები არიან ჯემალ ლეონიძე „მაგნატის“ მესაკუთრე, მისი ადვოკატი, ასევე ბადრი ჯაფარიძე და მამუკა ხაზარაძე.