“იმედია ჩვენმა პარტნიორებმა წარსულის გაკვეთილები ისწავლეს და შეეცდებიან, რომ ნეიტრალურ და ნამდვილად ობიექტურ ორგანიზაციებს მისცენ გრანტი”

იმედია, ჩვენმა პარტნიორებმა წარსულის გაკვეთილები ისწავლეს და შეეცდებიან, რომ ნეიტრალურ და ნამდვილად ობიექტურ ორგანიზაციებს მისცენ გრანტი, – განაცხადა პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ ბრიტანეთის საგარეო საქმეთა სამინისტროს მიერ გამოცხადებულ საგრანტო პროგრამასთან დაკავშირებით.

მისი თქმით, სავარაუდოა, რომ ამ გრანტს კვლავ „ისფედის“ მსგავსი ორგანიზაციები მიიღებენ.

„ვნახავთ, რომ ისევ იგივე ორგანიზაციები მიიღებენ ამ გრანტებს, რომლებიც ადრე იღებდნენ და რომელსაც შემდეგ საკმაოდ ცუდი გავლენა ჰქონდათ ზოგადად არჩევნების აღქმაზე. გახსოვთ 2020 წლის სკანდალი „ისფედთან“ დაკავშირებული. გახსოვთ ასევე, 2024 წლის სკანდალი ისევ „ისფედთან“ დაკავშირებული. ვნახოთ, იმედია, რომ ჩვენმა პარტნიორებმა გაკვეთილები ისწავლეს წარსულის და შეეცდებიან, რომ ნეიტრალურ და ნამდვილად ობიექტურ ორგანიზაციებს მისცენ გრანტი“, – განაცხადა ნიკოლოზ სამხარაძემ.

პარლამენტის თავმჯდომარე ბრიტანეთის საგარეო საქმეთა სამინისტროს მიერ გამოცხადებულ საგრანტო კონკურსში კორუფციის ნიშნებს ხედავს. აცხადებს, რომ გრანტი გაყალბებაში არაერთხელ მხილებული ორგანიზაცია „ისფედისთვისაა“ განკუთვნილი.

ცნობისთვის, ბრიტანეთის მთავრობის ოფიციალურ ვებ-გვერდზე გამოქვეყნებული ინფორმაციის მიხედვით, დიდი ბრიტანეთის საგარეო საქმეთა სამინისტრო, საქართველოში მუნიციპალური არჩევნების წინ საგრანტო პროგრამას აცხადებს, რათა „ხელი შეუწყოს 2025 წლის ოქტომბერში დაგეგმილი საქართველოს მუნიციპალური არჩევნების ეფექტურად ჩატარებას“.