უკრაინის შეიარაღებული ძალების ყოფილი მთავარსარდალი, გაერთიანებულ სამეფოში უკრაინის ელჩი ვალერი ზალუჟნი ადასტურებს, რომ 2022 წელს გერმანიის ქალაქ ვისბადენში საიდუმლო შტაბი შეიქმნა, სადაც უკრაინის სამხედრო სარდლობა ამერიკელ პარტნიორებთან ერთად, რუსეთის წინააღმდეგ ოპერაციებს გეგმავდა.
ამის შესახებ ვალერი ზალუჟნი სოციალურ ქსელ „ფეისბუქში“ წერს.
მანამდე ვისბადენის შტაბის შესახებ ამერიკული გამოცემა „ნიუ-იორკ თაიმსი“ წერდა.
„გასულ კვირას ბევრი საუბარი იყო ვისბადენზე. ეს შტაბი მართლაც გახდა ჩვენი და ჩვენი პარტნიორების საიდუმლო იარაღი ოპერაციების დაგეგმვასა და მათი განხორციელებისთვის საჭიროებების ჩამოყალიბებაში. მე ავხდი ფარდას, თუ როგორ იქმნებოდა ის. სრულმასშტაბიანი აგრესიის დაწყების შემდეგ ჩვენი პარტნიორების მხრიდან სამხედრო დახმარება მნიშვნელოვნად გაიზარდა, ჩვენ მივიღეთ სხვადასხვა სახის იარაღი და აღჭურვილობა, ამასთან – ახალი გამოწვევებიც, რომლებიც დაკავშირებული იყო მათ მიწოდებასა და შეკეთებასთან. სწორედ ამიტომ, 2022 წლის აპრილში ჩვენ შევქმენით უკრაინისთვის სამხედრო დახმარების მიწოდების კოორდინაციის ცენტრი“, – წერს ვალერი ზალუჟნი.
ყოფილი მთავარსარდლის განცხადებით, თავდაპირველად ეს ცენტრი ბაზირებული იყო შტუტგარდში აშშ-ის ევროპული სარდლობის შტაბ-ბინაში, მოგვიანებით კი ამ შტაბმა მუშაობა ვისბადენში გააგრძელა.
„მივხვდით, რომ ჩვენს პარტნიორებთან ერთად გვჭირდებოდა ერთობლივი ოპერატიული შტაბი, რომელიც შეაფასებდა იარაღისა და აღჭურვილობის საჭიროებებს ოპერაციების დაგეგმვის საფუძველზე. საკითხი განსაკუთრებით მწვავედ დადგა დღის წესრიგში 2022 წლის ზაფხულში, როდესაც ჩვენმა პარტნიორებმა ეჭვი გამოთქვეს უკრაინაში ფრონტისთვის გარკვეული ტიპის იარაღისა და საბრძოლო მასალის მიზანშეწონილობაში. სწორედ მაშინ გაგვიჩნდა ლოგისტიკური ცენტრის ბაზაზე ოპერატიული შტაბის შექმნის იდეა, რომელიც გაანალიზებდა უკრაინის შეიარაღებული ძალების დაგეგმილ ოპერაციებს და ნატო-ს სტანდარტების შესაბამისად ჩამოაყალიბებდა მათთვის საჭიროებებს. დიდი ბრიტანეთის მხარდაჭერით, ამ იდეის განხორციელება შესაძლებელი გახდა. და ვისბადენმა ახალი სიცოცხლე შეიძინა. ამ შტაბიდან იგეგმებოდა ოპერაციები, ტარდებოდა სამხედრო თამაშები, ყალიბდებოდა უკრაინის შეიარაღებული ძალების საჭიროებები და ისინი გადაიცემოდა ვაშინგტონსა და ევროპის დედაქალაქებში“, – აღნიშნავს ვალერი ზალუჟნი.
მისი თქმით, ეს პლატფორმა გახდა სამომავლო სამხედრო ოპერაციებთან და მათთვის საჭიროებების განსაზღვრასთან დაკავშირებით პარტნიორებთან თანამშრომლობის შესანიშნავი მექანიზმი.