არასამთავრობოები და მათი დონორები დღეს არიან მთავარი წყარო სიძულვილის გაღვივების და სამოქალაქო უთანხმოების შემოტანის მცდელობისა, – განაცხადა საქართველოს პარლამენტის თავმჯდომარემ სიძულვილის კამპანიაზე საუბრისას.
„შეგახსენებთ რა გვაკადრეს დონორებმა და მათმა „ენჯეოებმა“ 9 აპრილს, როდესაც გადაეღობნენ 9 აპრილის მონაწილეებს, მოქალაქეებს, ვისაც სურდა მისულიყო და პატივი მიეგო 9 აპრილის ტრაგედიის დროს დაღუპულების ხსოვნისთვის. სურდათ იმ თარიღში, რომელიც მთლიანად ერს აერთიანებს, შემოეტანათ დაყოფა. ეს გაკეთდა დონორების დაფინანსებით, რამდენიმე ენჯეოს ხელით. ამას მოჰყვა სიძულვილის და ზიზღის კამპანია, რომელიც რამდენიმე „ენჯეოს“ მხრიდან, დონორების ხელშეწყობით არის მართული. არც ერთი დონორი დღემდე არ გამიჯვნია ამ საზიზღარ კამპანიას, რომელსაც აწარმოებს რამდენიმე „ენჯეო“, მათ შორის პარლამენტის თავმჯდომარის მოადგილის სახლთან მივარდნა შუაღამეს, როცა იქ მცირეწლოვანი ბავშვიც იყო, მუქარები, სიკვდილისთვის გამეტება და ა.შ.
არც ერთი დონორი, რომელიც ამ ორგანიზაციებს აფინანსებს, არაფრად არ აგდებს ქართულ ქართულ საზოგადოებას. ის მაინც თქვან, რომ მიუღებელია, არ შეიძლება ან არასწორია. თვითონ გამონახონ სიტყვები, თუნდაც რბილად თქვან რამე“, – აღნიშნა შალვა პაპუაშვილმა.