უკრაინის პრეზიდენტმა, ვოლოდიმირ ზელენსკიმ განაცხადა, რომ მას ეჭვი აქვს, რომ აშშ-ის ვიცე-პრეზიდენტი, ჯეი დი ვენსი რუსეთის ქმედებების გამართლებით არის დაკავებული.
მისი თქმით, ჯეი დი ვენსი მოსკოვის ნარატივებს იმეორებს. ზელენსკის მტკიცებით, ის ვენსს 28 თებერვალს თეთრ სახლში სიტყვიერ დაპირისპირებამდეც შეხვდა.
„მას [ვენსს] ჰქონდა პოზიცია, რომელიც მე არაერთხელ მომისმენია, იმის შესახებ, რომ ადამიანები ორივე მხარეს იღუპებიან, რუსებიც კვდებიან და ცალსახა არაა, რომ რუსებმა დაიწყეს ომი. ეს არის ის ხაზი, რომელიც აშშ-ის წარმომადგენლებთან ყველა შეხვედრას თან სდევს. შენ უნდა თავი იმართლო იმის გამო, რაც არასდროს ჩაგიდენია. ანუ, ეს ტონალობის, რეალობის ცვლილებაა“, – აღნიშნა ზელენსკიმ.
მან კიდევ ერთხელ აღნიშნა, რომ ომი უკრაინას არ დაუწყია.
„მგონია, რომ ვიცე-პრეზიდენტი რაღაცნაირად პუტინის მოქმედებებს ამართლებს. მე შევეცადე მეთქვა, რომ რაღაც შუალედის ძებნა აქ საჭირო არ არის. არსებობს აგრესორი და მსხვერპლი. რუსეთი აგრესორია, ჩვენ – მსხვერპლი. ამას ყველა ხვდება“, – დასძინა ზელენსკიმ.