აშშ-სა და ევროკავშირს შორის სავაჭრო ომის ფონზე ევროპის მსხვილ ენერგეტიკულ კომპანიებს რუსული გაზის შესყიდვის მნიშვნელოვნად გაზრდა სურთ, – წერსსაინფორმაციო სააგენტო Reuters-ი.
როგორც სააგენტო Reuters-ი აღნიშნავს, რუსეთიდან ენერგომატარებლების იმპორტის გაზრდის იდეა გაძლიერდა იმ შიშის ფონზე, რომ ევროპა ზედმეტად დამოკიდებული გახდება ამერიკულ გაზზე.
ფრანგული კომპანია Engie-ის ხელმძღვანელის, დიდიე ოლოს თქმით, რუსეთიდან მიწოდებამ შეიძლება დააკმაყოფილოს ევროკავშირის მოთხოვნილების დაახლოებით 20-25%.
„თუ უკრაინაში გონივრული მშვიდობა დამყარდება, მაშინ შესაძლებელი იქნება რუსეთიდან ევროპაში მიწოდების მოცულობის განხილვა წელიწადში 60-70 მილიარდი კუბური მეტრის ოდენობით“, – განუცხადა მან Reuters-ს.
ფრანგული კომპანია TotalEnergies-ის ხელმძღვანელმა, პატრიკ პუიანემ განაცხადა, რომ ევროპამ უნდა მოახდინოს მიწოდების დივერსიფიცირება.
„ჩვენ გვჭირდება უამრავი მარშრუტი და არა ერთი-ორი. ევროპა არასოდეს დაუბრუნდება რუსეთიდან 150 მილიარდი კუბური მეტრის იმპორტს, როგორც ომამდე იყო, მაგრამ 70 მილიარდ კუბურ მეტრზე [ფსონს] დავდებდი“, – აღნიშნა მან.
გერმანიის ქიმიურ პარკ Leuna-ში, სადაც განლაგებულია ისეთი კომპანიების ქარხნები, როგორიცაა Dow Chemical და Shell, ინდუსტრიის წარმომადგენლებმა Reuters-ს განუცხადეს, რომ რუსეთიდან გაზი რაც შეიძლება მალე უნდა დაბრუნდეს.
„ჩვენ გვჭირდება რუსული გაზი, ჩვენ გვჭირდება იაფი ენერგია – არ აქვს მნიშვნელობა, ვისგან მოდის ის“, – ხაზგასმით აღნიშნა კომპანია Leuna-Harze-ს მმართველმა დირექტორმა, კლაუს პაურმა.