იქიდან გამომდინარე, რომ ჩვენ დაჩქარებულ რეჟიმში არ ვიმუშაოთ და ვინმეს სასპეკულაციო არ მივცეთ იმასთან დაკავშირებით, რომ რამდენიმე კვირით ადრე აიკრძალა ეს პარტიები არჩევნებამდე, კი ბატონო, ჩვენ ვტოვებთ ამ ველს თავისუფალს, – განაცხადა ფრაქცია „ქართული ოცნების“ თავმჯდომარის მოადგილემ ლევან მაჭავარიანმა საგამოძიებო კომისიის საქმიანობის ვადის გახანგრძლივებასთან დაკავშირებით.
მისი თქმით, კომისიის უფლებამოსილების ვადის გაგრძელებით, კოლექტიურ ნაცმოძრაობას მოახლოებულ არჩევნებში მონაწილეობის საშუალება ექნება.
ლევან მაჭავარიანის განმარტებით, „ქართული ოცნება“ სექტემბერში ყველა პროცესს დაასრულებს, მათ შორის საკონსტიტუციო სასამართლოში შევა სარჩელი „ნაცმოძრაობისა“ და მისი სატელიტი პარტიების აკრძალვის შესახებ.
„ჩვენ დავპირდით ჩვენს ამომრჩეველს, რომ 2025 წელს დასრულდებოდა, როგორც ლიბერალური ფაშიზმი საქართველოში, ისე დასრულდებოდა კოლექტიური „ნაციონალური მოძრაობა“ საქართველოში. ჩვენ ამ პირობას აუცილებლად შევასრულებთ. უბრალოდ, იქიდან გამომდინარე, რომ შემოდის ძალიან ბევრი განცხადება დაზარალებული ოჯახებისგან ამ რეჟიმის წინააღმდეგ, საგამოძიებო კომისიამ მოითხოვა დამატებით ერთ თვიანი ვადა, ვინაიდან ფიზიკურად ვერ ასწრებს ამ ყველაფრის განხილვას. იქიდან გამომდინარე, რომ ჩვენ დაჩქარებულ რეჟიმში არ ვიმუშაოთ და ვინმეს სასპეკულაციო არ მივცეთ იმასთან დაკავშირებით, რომ რამდენიმე კვირით ადრე აიკრძალა ეს პარტიები არჩევნებამდე, კი ბატონო, ჩვენ ვტოვებთ ამ ველს თავისუფალს“, – განაცხადა ლევან მაჭავარიანმა.
ცნობისთვის, საგამოძიებო კომისიის საქმიანობის ვადა ერთი თვით გახანგრძლივდება.