აშშ ირანს გამდიდრებული ურანის მარაგების მესამე ქვეყნისთვის, მაგალითად, რუსეთისთვის გადაცემას სთავაზობს. ინფორმაციას The Guardian-ი ავრცელებს.
ამრიგად, როგორც გამოცემა წერს, ვაშინგტონს თეირანის სამოქალაქო ბირთვული პროგრამის შემცირება და ბირთვული იარაღის წარმოების არდაშვება სურს.
როგორც The Guardian-ი იუწყება, ეს საკითხი მომავალ ბირთვულ შეთანხმებაში მთავარ სირთულეს წარმოადგენს. სავარაუდოდ, მას 12 აპრილს ომანში აშშ-ის პრეზიდენტის, დონალდ ტრამპის სპეცწარმომადგენლის ახლო აღმოსავლეთში, სტივ უიტკოფისა და ირანის საგარეო საქმეთა მინისტრის, აბას არაღჩის შეხვედრაზე განიხილავდნენ.
მიუხედავად, რომ შეხვედრები არაპირდაპირი იყო, უიტკოფმა და არაღჩიმ პირდაპირი შეხვედრები მაინც გამართეს, წერს The Guardian-ი.
ირანი დარწმუნებულია, რომ გამდიდრებული ურანის მარაგები ქვეყანაში ატომური ენერგიის საერთაშორისო სააგენტოს მკაცრი ზედამხედველობის ქვეშ უნდა დარჩეს. ასე ირანს თავის დაზღვევა სურს, თუ აშშ შეთანხმებას დატოვებს, როგორც ეს 2018 წელს მოხდა.
თუ ირანი გამდიდრებულ ურანს მესამე ქვეყანას გადასცემს, ხოლო ამერიკა კვლავ გავა შეთანხმებიდან, თეირანს ყველაფრის დაწყება ნულიდან მოუწევს, აღნიშნულია სტატიაში.
აშშ-სა და ირანს შორის მოლაპარაკებების შემდეგი რაუნდი 19 აპრილს რომში გაიმართება. მას შუამავლობას ისევ ომანი გაუწევს. გამოცემა აღნიშნავს, რომ იმავე დღეს იტალიის დედაქალაქში აშშ-ის ვიცე-პრეზიდენტი, ჯეი დი ვენსი იქნება.