უკრაინის პრეზიდენტმა, ვოლოდიმირ ზელენსკიმ კომენტარი გააკეთა აშშ-ის ადმინისტრაციის, კერძოდ დონალდ ტრამპის რბილ რეაქციაზე ბოლო კვირების განმავლობაში უკრაინის ქალაქებზე რუსეთის დარტყმებთან დაკავშირებით.
„ამერიკული პოლიტიკური წრეების უფრო რბილი რეაქცია… ის განსხვავებულია. ვფიქრობ, ადმინისტრაციის რბილი რეაქცია არსებული პოლიტიკის გაგრძელებაზე მიუთითებს. ვფიქრობ, ისინი მიიჩნევენ, რომ სწორედ ასეთი დიპლომატია, ეს ფორმატი იმუშავებს ომის შესაჩერებლად“, – აღნიშნა უკრაინის პრეზიდენტმა.
მან ასევე დასძინა, რომ სუმზე თავდასხმას შეცდომა არ შეიძლება ეწოდოს, რადგან ეს მკვლელობაა და დარტყმა ქალაქის ცენტრში განხორციელდა და არა ფრონტზე.
მაშინ, როდესაც ევროპელმა ლიდერებმა თავდასხმა დაგმეს, ტრამპმა უფრო რბილი ტონი აირჩია და განაცხადა, რომ მიუხედავად იმისა, რომ დარტყმა საზარელი იყო, სავარაუდოდ ის შეცდომით მოხდა.
