კატარმა და ეგვიპტემ ისრაელსა და „ჰამასს“ 5-7 წლით ზავის გაფორმება შესთავაზეს, – ამის შესახებ ინფორმაციას პალესტინელ მაღლაჩინოსანზე დაყრდნობით „ბიბისი“ ავრცელებს.
როგორც წყარო ამტკიცებს, ეს წინადადება მოიცავს ზავის გაფორმებას 5-7 წლის ვადით, ასევე ყველა ისრაელელი მძევლის გათავისუფლებას ისრაელის ციხეებში მყოფი პალესტინელი პატიმრების გათავისუფლების სანაცვლოდ, ომის ოფიციალურად დასრულებას და ისრაელის სრულად გასვლას ღაზის სექტორიდან.
პალესტინელი მაღალჩინოსანი აცხადებს, რომ „ჰამასი“ მზადაა, ღაზის სექტორზე კონტროლი გადასცეს ნებისმიერ პალესტინურ ორგანიზაციას, რომელიც შეთანხმებული იქნება „ეროვნულ და რეგიონულ დონზე“.
მისივე თქმით, ეს შეიძლება იყოს როგორც პალესტინის ადმინისტრაცია, რომელიც მდინარე იორდანეს დასავლეთ სანაპიროს აკონტროლებს, ასევე ხელახლა შექმნილი ადმინისტრაციული ორგანო.
ისრაელის პრემიერ-მინისტრი ბენიამინ ნეთანიაჰუ მანამდე წინააღმდეგი იყო, რომ პალესტინის ადმინისტრაციას მონაწილეობა მიეღო ღაზის სექტორის მართვაში.
„ბიბისის“ წყაროების ცნობით, ჯერ ნაადრევია საუბარი, იქნება თუ არა ახალი სამშვიდობო გეგმა წარმატებული, თუმცა, მათივე თქმით, კატარმა და ეგვიპტემ სერიოზული ძალისხმევა გასწიეს, ხოლო „ჰამასმა“ უპრეცედენტო მოქნილობა გამოიჩინა.
ტელეკომპანიის ცნობით, „ჰამასის“ დელეგაცია ეგვიპტის დედაქალაქში აპირებს ჩასვლას კონსულტაციების გასამართად.
ისრაელს შუამავლების ახალ შეთავაზებაზე ჯერ კომენტარი არ გაუკეთებია.
ცნობისთვის, კატარმა და ეგვიპტემ საკუთარი წინადადება მას შემდეგ წარადგინეს, რაც „ჰამასმა“ უარყო ისრაელის გეგმა, რომელიც განიარაღების სანაცვლოდ ექვსთვიან ზავს ითვალისწინებდა.
შეგახსენებთ, რომ ისრაელმა ღაზის სექტორში საბრძოლო მოქმედებები 18 მარტს განაახლა. 19 აპრილს ისრაელის პრემიერ-მინისტრმა განაცხადა, რომ არ შეაჩერებს ომს, ვიდრე „ჰამასი“ არ განადგურდება და ყველა მძევალი არ იქნება გათავისუფლებული. „ჰამასი“ მოითხოვს, რომ საბრძოლო მოქმედებები მძევლების გათავისუფლებამდე შეწყდეს.
