გაეროს გენერალური მდივანი, ანტონიო გუტერეში ღრმად შეშფოთებულია საკონტროლო ხაზსა და საერთაშორისო საზღვარზე ინდოეთის სამხედრო ოპერაციით.
გაეროს ხელმძღვანელმა ინდოეთსა და პაკისტანს მაქსიმალური სამხედრო თავშეკავებისკენ მოუწოდა.
„გენერალური მდივანი ძალიან შეშფოთებულია საკონტროლო ხაზსა და საერთაშორისო საზღვარზე ინდოეთის სამხედრო ოპერაციით. ის ორივე ქვეყანას მაქსიმალური სამხედრო თავშეკავებისკენ მოუწოდებს“, – განაცხადა ანტონიო გუტერეშის პრესმდივანმა.
მისი თქმით, „მსოფლიოს არ შეუძლია ინდოეთსა და პაკისტანს შორის სამხედრო დაპირისპირების დაშვება“.
მანამდე ინდოეთის თავდაცვის სამინისტროში განაცხადეს, რომ ინდოეთის შეიარაღებულმა ძალებმა დაიწყეს ოპერაცია „სინდური“, რომლის ფარგლებში დარტყმა მიაყენეს ტერორისტულ ინფრასტრუქტურას პაკისტანში და პაკისტანის მიერ ოკუპირებულ ჯამუსა და ქაშმირში, საიდანაც იგეგმებოდა და ხორციელდებოდა ტერორისტული თავდასხმები ინდოეთის წინააღმდეგ.
პაკისტანის პრემიერ-მინისტრმა, შეჰბაზ შარიფმა განაცხადა, რომ პაკისტანს აქვს სრული უფლება, ძალისმიერად უპასუხოს ინდოეთის მიერ თავსმოხვეულ ომის ამ აქტს.