ნატო-ს წევრი ქვეყნები შეთანხმდნენ, რომ მომავალ ათ წელში თავდაცვის ხარჯები მთლიანი შიდა პროდუქტის 5%-მდე გაზარდონ, – ამის შესახებ აშშ-ის სახელმწიფო მდივანმა, მარკო რუბიომ „ფოქს ნიუსის“ ეთერში განაცხადა.
რუბიოს თქმით, სამიტამდე, რომელიც ჰააგაში რამდენიმე კვირაში გაიმართება, თითქმის ყველა წევრი ქვეყნის თავდაცვის ხარჯები მშპ-ის 2% ან მეტი იქნება.
„რაც უფრო მნიშვნელოვანია, მათგან ბევრი იქნება 4%-ზე მეტი. ყველა შეთანხმდა მიზანზე, რომ მიაღწიონ 5%-ს მომავალი ათწლეულის განმავლობაში. ეს ისტორიული მომენტია, თუ განხორციელდება. ეს არის ის, რაზეც შეთანხმდნენ საგარეო საქმეთა მინისტრები. ვფიქრობ, ეს ყველაფერი უკავშირდება 2018 წელს, როდესაც პრეზიდენტმა დონალდ ტრამპმა გამოიწვია ალიანსის წევრები, რომ აემაღლებინათ თავიანთი წვლილი“, – აღნიშნა რუბიომ.
მანამდე გერმანიის საგარეო საქმეთა მინისტრმა, იოჰან ვადეფულმა განაცხადა, რომ გერმანია მზადაა, თავდაცვის ხარჯი მშპ-ის 5%-მდე გაზარდოს. 15 მაისს, თურქეთში ნატო-ს საგარეო საქმეთა მინისტრების არაფორმალური შეხვედრის დროს ვადეფულმა აღნიშნა, რომ ტრამპმა 5% ითხოვა და ისინი მას მიჰყვებიან.