მინდა, ყველას მოგცეთ პირობა საქართველოს მთავრობის სახელით, რომ ხელისუფლება ბოლომდე იდგება ჩვენი ტრადიციული ფასეულობებისა და ეროვნული ინტერესების სადარაჯოზე, – ამ სიტყვებით მიმართა საქართველოს პრემიერ-მინისტრმა ირაკლი კობახიძემ სამების საკათედრო ტაძარში შეკრებილ საზოგადოებას, სადაც ოჯახის სიწმინდისა და მშობლების პატივისცემის დღისადმი მიძღვნილ პარაკლისს დაესწრო.
პრემიერმა დღევანდელი დღე მიულოცა სრულიად საქართველოს და ხაზი გაუსვა ქართული საზოგადოების ერთიანობის მნიშვნელობას ტრადიციული ღირებულებების დასაცავად.
„ძალიან მნიშვნელოვანია, რომ ერთად დგას ერი და ბერი, ეკლესია და ხელისუფლება და ერთად დგას ქართული საზოგადოება ჩვენი ეროვნული, ტრადიციული ფასეულობებისა და ღირებულებების გარშემო. მინდა, მადლობა გადავუხადო უწმინდესსა და უნეტარესს, საქართველოს კათოლიკოს-პატრიარქს, ილია მეორეს, რომელმაც დააწესა ეს უმნიშვნელოვანესი დღე ჩვენს ქვეყანაში; მადლობა გადავუხადო საპატრიარქო ტახტის მოსაყდრეს, მეუფე შიოს, რომელიც დღეს მიუძღვებოდა ამ უძვირფასეს მსვლელობას. მინდა, კიდევ ერთხელ გავუსვა ხაზი ერთიანობის მნიშვნელობას და მივულოცო ყველას, ვინც შეუერთდა დღევანდელ მსვლელობას. იყო მრავალი ადამიანი, რომლებიც დღეს არ იყვნენ მსვლელობის მონაწილე, მაგრამ შორიდან გულშემატკივრობდნენ ამ მსვლელობას. ჩვენ ასევე დღეს უნდა მივმართოთ იმ ადამიანებს, რომლებიც თავიანთი შეხედულებების გამო არ შეუერთდნენ ამ მსვლელობას. ისინიც უნდა გავიხსენოთ სიყვარულით და ვუსურვოთ, რომ მომავალში, ხვალ გაიზიარონ ის ფასეულობები, რომელთა გარშემოც დღევანდელი ერთობა შეიკრიბა. მინდა, მათ და ჩვენს თავსაც ვუსურვო, რომ მომავალ წელს, როდესაც ეს მსვლელობა გაიმართება, ისინიც ყოფილიყვნენ ამის მონაწილენი. ბრძოლა გრძელდება ტრადიციული ფასეულობებისთვის. ეს ბრძოლა არ არის იოლი. არიან ძლიერი ძალები, რომლებიც უპირისპირდებიან ტრადიციულ ფასეულობებს, ქმნიან ყალბ იდეოლოგიებს, ფასეულობებს და ჩვენი ვალი და პასუხისმგებლობაა, რომ დედაეკლესიის მხარდამხარ ვიბრძოლოთ ეროვნული ფასეულობების დასაცავად,“ – განაცხადა ირაკლი კობახიძემ.
პრემიერ-მინისტრი პრეზიდენტთან, პარლამენტის თავმჯდომარესთან, თბილისის მერთან, აღმასრულებელი და საკანონმდებლო ხელისუფლების წევრებთან ერთად ქაშვეთის ტაძარში დაესწრო ლოცვას, რომელიც საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ ოჯახის სიწმინდის დღესთან დაკავშირებით აღავლინა. ირაკლი კობახიძე, მიხეილ ყაველაშვილი, შალვა პაპუაშვილი და კახა კალაძე შეუერთდნენ მსვლელობას, რომელიც ქაშუეთის ტაძრიდან დაიწყო და სამების საკათედრო ტაძარში დასრულდა.
