„თეთრი სახლი დიდი ხანია ჩაეხსნა დონალდ ტრამპ-უმცროსის პირველ შეფასებას, რომ რუმინეთში ადგილი ჰქონდა „სოროსისტულ-მარქსისტულ გადატრიალებას“. დღეს ვაშინგტონის ადმინისტრაციას ეს საკითხი აღარ აღელვებს“, – წერს სოციალურ ქსელში „ხალხის ძალის“ წევრი დავით ქართველიშვილი და რუმინეთის საპრეზიდენტო არჩევნებში ულტრამემარჯვენე ძალების დამარცხებაში „დიფ სთეითის“ გავლენებზე აკეთებს აქცენტს. როგორც ექსპერტი აღნიშნავს, როდესაც „დიფ სთეითის“ დამარცხების გზები ჯერჯერობით არ ჩანს, რუმინეთის საპრეზიდენტო არჩევნებში ჯორჯესკუს და სიმეონის გამარჯვება შეუძლებელი იყო.
ექსპერტი წერს, რომ ევროსკეპტიკოსი, ტრადიციონალისტი და სუვერენული ძალების გამარჯვება რუმინეთში თავიდანვე განწირული იყო, რასაც საპრეზიდენტო არჩევნების შედეგებიც ცხადყოფს.
„რუმინეთში არც ჯორჯესკუს და არც სიმეონს საპრეზიდენტო არჩევნებში გამარჯვების არანაირი შანსი არ ჰქონდა იმ პირობებში, როდესაც „დიფ სთეითის“ დამარცხება/დასუსტებისაგან ტრამპი ჯერ კიდევ ძალიან შორსაა. ისევე, როგორც ხალხის რჩეული რეალური კანდიდატი მოლდოვაში დაამარცხეს რუმინელმა მოლდოველებმა, რუმინეთშიც არჩევნებში გაიმარჯვეს მოლდოველმა რუმინელებმა. აი ასეთი გასაოცარი საარჩევნო „კარუსელია“ დღეს ამ ორ ქვეყანაში.
თეთრი სახლი დიდი ხანია ჩაეხსნა დონალდ ტრამპ-უმცროსის პირველ შეფასებას, რომ რუმინეთში ადგილი ჰქონდა „სოროსისტულ-მარქსისტულ გადატრიალებას“. დღეს ვაშინგტონის ადმინისტრაციას ეს საკითხი აღარ აღელვებს: ახალი პრეზიდენტის პირობებში აქტიურად დაიწყება რუმინეთზე გამავალი ახალი „ბუფერული ზონის” მშენებლობა აზიასა და ევროპას შორის. ამისთვის კი მათ „თავისიანი“ პრეზიდენტი სჭირდებოდა.
„დიფ სთეითის“ მიერ უკვე გამოყოფილია მსუყე ფინანსური რესურსები რუმინეთში ევროპაში უმსხვილესი ახალი ავიაბაზის მშენებლობაზე, რომელიც გერმანულ „რამშტაინზე“ უფრო მასშტაბური იქნება და მას 10 ათასიანი სამხედრო კონტინგენტი მოემსახურება. ობიექტის ფართობი – 2800 ჰექტარია, პერიმეტრი – 30 კილომეტრი, პროექტის ღირებულება – 2.5 მილიარდი დოლარი.
ამ მოცემულობაში ევროსკეპტიკოსი, ტრადიციონალისტი და სუვერენული ძალების გამარჯვება რუმინეთში – თავიდანვე განწირული იყო. რა არჩევნები, რის დემოკრატია, ეს ზღაპრები „დიფ სთეითის“ მიერ დღეს მხოლოდ საქართველოსთვის არის შენარჩუნებული. ჩვენ კი, მორიგ ჯერზე შევიგნოთ – ვინ არის ჩვენი მტერი და ვინაა მოყვარე. შევიგნოთ, რომ პირადი ანტიპათიების მიუხედავად, დღეს ხელისუფლების და დედაეკლესიის სინერგიის გარშემო უნდა გავერთიანდეთ“, – წერს დავით ქართველიშვილი.