„სტრატეგია აღმაშენებლის“ ლიდერი გიორგი ვაშაძე 50 000-ლარიან გირაოს გადაიხდის. ამის შესახებ „ქრონიკას“ პარტიის ერთ-ერთმა ლიდერმა, პაატა მანჯგალაძემ განუცხადა. გადაწყვეტილება პარტიის პოლიტსაბჭოზე მიიღეს.
„ჩვენ მივიღეთ გადაწყვეტილება, რომ იმისათვის, რომ მწყობრი, წინააღმდეგობრივი მოძრაობის ფორმირება მოხდეს, საჭიროა ლიდერები იყვნენ არა ციხეში, არამედ გარეთ”, – განუცხადა პაატა მანჯგალაძემ „ქრონიკას“.
გიორგი ვაშაძეს დროებითი საგამოძიებო კომისიის სხდომაზე გამოუცხადებლობის საქმეზე აღკვეთის ღონისძიების სახით 50 000-ლარიანი გირაო 23 აპრილს შეეფარდა. სასამართლომ ვაშაძეს გირაოს გადახდის ვადად 30 დღე განუსაზღვრა.
„სტრატეგია აღმაშენებლის“ ლიდერი დროებითმა საგამოძიებო კომისიამ 15 აპრილს დაიბარა, თუმცა, ვაშაძე სხდომაზე არ გამოცხადდა, რის შემდეგაც, ის ჩვენების მისაცემად პროკურატურაში დაიბარეს. გიორგი ვაშაძეს ბრალდება სისხლის სამართლის კოდექსის 349-ე მუხლით წაუყენეს, რაც „საქართველოს პარლამენტის დროებითი საგამოძიებო კომისიის მოთხოვნის შეუსრულებლობას“ გულისხმობს და დასჯადია.
პარლამენტის დროებითი საგამოძიებო კომისია 2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობას სწავლობს.