პარლამენტის ლეგიტიმაციას ქართველი ხალხი განსაზღვრავს და ეს ბოლოს 26 ოქტომბერს მოხდა, საიას განცხადება ამომრჩევლის შეურაცხყოფაა, – ამის შესახებ საპარლამენტო უმრავლესობის წევრმა, ვლადიმერ ბოჟაძემ განაცხადა.
მისი თქმით, საქართველოში არჩევნები რომ შედგა, საერთაშორისო ორგანიზაციების მიერ არის დადასტურებული.
„როგორ შეიძლება, პარლამენტს არალეგიტიმური და თვითმარქვია ეძახო? ამერიკაში დღესაც საპარლამენტო დელეგაცია იმყოფება. საიას მხრიდან დემოკრატიის უგულებელყოფა ხდება. თან ამას ევროკავშირის ფონდებიდან აფინანსებენ, რაზეც რეაგირება არცერთ დონორს არ აქვს, რაც მიუღებელია. პარლამენტის ლეგიტიმაციას ქართველი ხალხი განსაზღვრავს და ეს ბოლოს 26 ოქტომბერს მოხდა. მათი განცხადება ამომრჩევლის შეურაცხყოფაა. უპასუხისმგებლო ოპოზიცია პარლამენტში რომ არ შემოვიდა, მათი ბრალია, მაგრამ ის, რომ არჩევნები შედგა, ეს საერთაშორისო ორგანიზაციების მიერ არის დადასტურებული“, – განაცხადა ვლადიმერ ბოჟაძემ.
„საქართველოს ახალგაზრდა იურისტთა ასოციაციის“ შეფასებით, „არალეგიტიმურ პარლამენტში დღეს მოქმედმა „ქართული ოცნების“ საგამოძიებო კომისიის შექმნის ინიციატორებმა არ დაიცვეს მნიშვნელოვანი პროცედურული წესები და ობიექტური გამოძიების ნაცვლად, კომისიას სადამსჯელო პოლიტიკური ხასიათი მიანიჭეს“.