საზოგადოება ძალიან კარგად ხედავს, რა პროცესებთან გვაქვს საქმე. პრინციპში, განსხვავებული არაფერი არ არის და ოპოზიციაში ერთ წრეზე ტრიალებენ თავიდან ბოლომდე, – განაცხადა „ხალხის ძალის“ აღმასრულებელმა მდივანმა, პარლამენტის დროებითი საგამოძიებო კომისიის წევრმა, გურამ მაჭარაშვილმა პირველი არხის გადაცემის, „აქტუალური თემა – მაკა ცინცაძესთან ერთად“ წამყვანის შეკითხვაზე, როგორ აფასებს ოპოზიციის ლიდერთა განსხვავებულ გადაწყვეტილებებს საგამოძიებო კომისიაზე გამოუცხადებლობის გამო შეფარდებული გირაოს გადახდა-არგადახდასთან დაკავშირებით და რა სტრატეგიაა გირაოს გადაუხდელობა და ციხეში წასვლა.
„ჩვენ გვახსოვს დაახლოებით ოთხი თუ ხუთი წლის წინ ნიკა მელიას სიტყვები, არ გადავიხდიო და გადაიხადა, არ გამოვალ ციხიდანო და გამოვიდა, არ შევალ პარლამენტშიო, მაგრამ შევიდა და ა.შ. ანუ, ამ ხალხს, გარდა იმისა, რომ პოლიტიკურად განულებული არიან, არანაირი პასუხისმგებლობა არ გააჩნიათ არავის წინაშე, გარდა ერთისა, თავიანთი პატრონისა, რომლის წინაშეც კეკლუცობენ. ერთადერთი, რაც შეიძლება, ამ პროცესებს უწოდო, ეს არის – მათმა პატრონმა იცის, რომ არაფრის მაქნისები არ არიან არც „ნაცმოძრაობაში“ და არც მის ფილიალებში და პირდაპირ ელჩები ჩართეს, აქ შტაბის უფროსებად დანიშნეს პრაქტიკულად პროცესებში და ამიტომ ეკეკლუცებიან ახლა უცხოელ პარტნიორებს. თავად ის ფაქტი, რომ ადამიანი პირდაპირ ამბობს, მე უნდა ჩავიდინო სისხლის სამართლის დანაშაული და თუ დამიჭერთ, მაშინ ვიქნები პოლიტპატიმარი და, რაც მთავარია, ამას არ ეთანხმებიან მისი სხვა კოლეგები „ნაციონალურ მოძრაობაში“, უკვე ნიშნავს იმას, რომ თავიდანვე გათვლილი აქვს ის, რომ უნდა გამოვიდეს „გმირი“. ეს არის მთელი ანი-ბანი, რაც, რა თქმა უნდა, არ გამოდის. ძალიან კარგად იცის ახლა ოქრუაშვილმაც და გირჩი ჯაფარიძემაც, რომ მათგან არც არანაირი „გმირი“ არ გამოვა და ამას არც არავინ შეუფასებს პოზიტიურად, მათივე ამომრჩეველიც კი, თუმცა ეს არის მათი გადაწყვეტილება. ეს ადამიანები ყოველთვის წუწუნებდნენ იმაზე, რომ პოლიტიკურ ზედაპირზე ვერ ტივტივებდნენ, მათ შორის, ვერც „ნაციონალურ მოძრაობაში“. ეს არის მოცემულობა“, – განაცხადა მაჭარაშვილმა.
მაკა ცინცაძის შეკითხვას, იმუშავა თუ არა ოპოზიციის ამ სტრატეგიამ, რადგან ვნახეთ ევროპარლამენტარების კრიტიკა და დიდი ბრიტანეთი ღრმად შეშფოთებულია ზურაბ ჯაფარიძისთვის წინასწარი პატიმრობის შეფარდებით და მიიჩნევს, რომ მისი დაკავება სრულიად არაპროპორციული ზომაა, რომელიც მიზნად ისახავს პოლიტიკური ოპოზიციის დაშინება-გაჩუმებას, გურამ მაჭარაშვილმა კითხვითვე უპასუხა: „მე მგონი, დიდი ბრიტანეთის საელჩო სააკაშვილის დროსაც არსებობდა საქართველოში, „ნაციონალური მოძრაობის“ დროს, რამდენადაც მახსოვს, და თქვენ ერთი განცხადება მაინც თუ გახსოვთ ან ვინმეს თუ ახსოვს, როდესაც ხდებოდა დარბევა, დაწიოკება, ქუჩაში ადამიანების სიკვდილი და ა.შ., რაც დადასტურებულია?“
„ეს მონაყოლი კი არ არის, დადასტურებულია ქართული და საერთაშორისო სასამართლოს მიერ, და მათ შორის, იმ ასზე მეტი ადამიანის მიერ, რომელიც კომისიაზე მოდის და იხსენებს თავისი კადრებით, ფაქტებით და ა. შ., მაგრამ არავის არ ახსოვს ერთი განცხადებაც კი, მათ შორის, გაერთიანებული სამეფოს, დიდი ბრიტანეთის საელჩოსი. დღეს კი, როდესაც არანაირი საფუძველი არ აქვს არავის და არც საელჩოს არ აქვს, რომ ასეთი განცხადება გააკეთოს, ამ შეურაცხყოფას აყენებს ქართულ საზოგადოებას“, – განაცხადა მაჭარაშვილმა.
მისი თქმით, დღეს ყველაზე მძლავრი იარაღი არის დეზინფორმაცია და დღევანდელი „დიფ სთეითი“, იგივე „გლობალური ომის პარტია“ თავიდან ბოლომდე დეზინფორმაციული მანქანებით იბრძვის იმისთვის, რომ ყველგან შეაღწიოს.
„ჩვენი თუ არ სჯერათ, ამერიკის დღევანდელ პრეზიდენტს მაინც დაუჯერონ. ეს რეალობაა, სამწუხაროდ“, – განაცხადა მაჭარაშვილმა.
ამასთან, მაჭარაშვილმა აღნიშნა, რომ გერმანიის ელჩის განცხადებასაც არავითარი ლოგიკა არ აქვს.
„გერმანიის ელჩის განცხადებას რამე ლოგიკა აქვს? მე დარწმუნებული ვარ, მათ ძალიან კარგად იციან, რა არის რეალობა, თორემ საელჩოს განცხადებაზე კი არა, ნებისმიერი ერთი ევროპარლამენტარის განცხადებაზეც კი, თუკი სიმართლეს შეესაბამება ნებისმიერი ფაქტი საქართველოში, რა თქმა უნდა, რეაქციები მოჰყვება საზოგადოებაში, მაგრამ, აი, გადავხედოთ, მოჰყვება რეაქციები? პირიქითა რეაქციები ხდება, როდესაც საზოგადოება ხედავს, რომ უსამართლობას ამბობს ნებისმიერი ტიპის საელჩო თუ საერთაშორისო ორგანიზაცია. აი, ამიტომ ვამბობდით ჩვენ ყოველთვის და, სხვათა შორის, ამიტომ თქვა ევროსაბჭოს გენერალურმა მდივანმა, რომ არ შეიძლება, გაცვითო ევროპული ღირებულებები უსამართლო განცხადებებით. ჩვენ თუ არ გვიჯერებენ, მას მაინც დაუჯერონ“, – განაცხადა მაჭარაშვილმა.