ეს მნიშვნელოვანი ფაქტია, რომ მოხდა დაკავება ადამიანის, რომელსაც 11 წელი ჰქონდა მისჯილი საქართველოს მართლმსაჯულების მხრიდან, – განაცხადა საქართველოს პარლამენტის თავმჯდომარემ შალვა პაპუაშვილმა ჟურნალისტებთან გიორგი ბაჩიაშვილის დაკავებაზე საუბრისას.
„ის, რომ მისი დაკავება მოხდა საქართველოს უსაფრთხოების სამსახურის მხრიდან, აჩვენებს კიდევ ერთხელ, რომ საქართველოში სამართლებრივი სახელმწიფო არის მყარად დამკვიდრებული. ის, რომ არავის არ ექნება შესაძლებლობა, რომ გაექცეს მართლმსაჯულებას და ამ მხრივაც არის მნიშვნელოვანი, რომ ყველამ იცოდეს, რომ ყველას მოუწევს პასუხისგება საქართველოს სასამართლოს წინაშე და შესაბამისი სასჯელის მოხდა.
ყველამ ნახა, რომ ისე ჩატარდა ეს ღონისძიება, თმის ერთი ღერიც კი არ ჩამოვარდნია ამ ადამიანს, ამიტომ განსაკუთრებული მადლობა მინდა გადავუხადო სახელმწიფო უსაფრთხოების სამსახურს, მის ხელმძღვანელს და იმ დანაყოფებს, რომელიც ამ ოპერაციაში იყვნენ ჩართული“, – აღნიშნა შალვა პაპუაშვილმა.