ჩვენთვის ძალიან სასიხარულოა, რომ ესტონელი ტურისტების რაოდენობა ჩვენს ქვეყანაში ყოველწლიურად მატულობს. დარწმუნებული ვარ, საქართველოს მოქალაქეთათვის ახლახან დამტკიცებული უვიზო რეჟიმი კიდევ უფრო გაააქტიურებს ადამიანებს შორის კონტაქტებს, – ამის შესახებ საქართველოს პრემიერ-მინისტრმა გიორგი კვირიკაშვილმა ესტონელ კოლეგასთან ერთობლივ პრესკონფერენციაზე განაცხადა.
მისი თქმით, ესტონეთსა და საქართველოს შორის თანამშრომლობა სწრაფად ვითარდება ყველა მიმართულებით, რის შედეგად იზრდება ჩვენი ეკონომიკური ურთიერთობები და შესაბამისი სტატისტიკა.
„2017 წელი მნიშვნელოვანია ჩვენი ორმხრივი ურთიერთობებისთვისაც, რადგანაც წელს აღინიშნება საქართველოსა და ესტონეთის რესპუბლიკას შორის დიპლომატიური ურთიერთობების 25-ე წლისთავი. ჩვენი ხანგრძლივი მეგობრობისა და მტკიცე პარტნიორობის შედეგები თავადვე მეტყველებენ ჩვენს წარმატებაზე.
სიამაყით აღვნიშნავთ, რომ ჩვენი თანამშრომლობა სწრაფად ვითარდება ყველა მიმართულებით, რის შედეგად იზრდება ჩვენი ეკონომიკური ურთიერთობები და შესაბამისი სტატისტიკა – გასულ წელს დაფიქსირდა 21-პროცენტიანი ზრდა. ჩვენ მივესალმებით ესტონური ინვესტიციების ზრდას, განსაკუთრებით ენერგეტიკის სფეროში, ასევე – ესტონეთში ქართული ღვინის ექსპორტის ზრდას.
ჩვენთვის ძალიან სასიხარულოა, რომ ესტონელი ტურისტების რაოდენობა ჩვენს ქვეყანაში ყოველწლიურად მატულობს. დარწმუნებული ვარ, საქართველოს მოქალაქეთათვის ახლახან დამტკიცებული უვიზო რეჟიმი კიდევ უფრო გაააქტიურებს ადამიანებს შორის კონტაქტებს. გარდა ამისა, ის საქართველოს მოქალაქეებს მისცემს შესაძლებლობას, ესტონეთის მაგალითზე თავად გაეცნონ ევროინტეგრაციის დადებით შედეგებს.
ჩემთვის განსაკუთრებით სასიხარულოა, რომ ჩვენი თანამშრომლობა სრულ თანხმობაშია საქართველოს მთავრობის რეფორმების 4-პუნქტიან გეგმასთან – საგადასახადო რეფორმა, რომელიც ხორციელდება ესტონური მოდელის საფუძველზე და უკვე წარმატებით უზრუნველყოფს ახალი დინამიკის შემოტანას საქართველოს ეკონომიკურ განვითარებაში;
მეწარმეობის ხელშეწყობა, ელექტრონული მმართველობა, საგანმანათლებლო რეფორმა. ამავდროულად, ხშირად ხორციელდება ჩვენს უწყებებსა და შესაბამის სამინისტროებს შორის მაღალი რანგის ვიზიტები და უპრეცედენტო თანამშრომლობა. ესტონელი ექსპერტები მუშაობენ თითქმის ყველა სფეროში და წვლილი შეაქვთ ჩვენი საჯარო მოხელეების შესაძლებლობების გაზრდაში“, – განაცხადა გიორგი კვირიკაშვილი.
საქართველოს პრემიერ-მინისტრმა ყურადღება გაამახვილა საქართველოსა და ესტონეთს შორის განათლების სფეროში თანამშრომლობაზე და აღნიშნა, რომ განათლების მისაღებად და სამეცნიერო კვლევების განსახორციელებლად ესტონეთს სულ უფრო მეტი ქართველი სტუდენტი ირჩევს.
„სულ უფრო მეტი ქართველი სტუდენტი ირჩევს ესტონეთს განათლების მისაღებად და სამეცნიერო კვლევების განსახორციელებლად, რაც განსაკუთრებით მნიშვნელოვანია, რადგანაც სწორედ ეს სტუდენტები გახდებიან მომავალში ესტონეთის კულტურის ელჩები საქართველოში. კიდევ ერთხელ უნდა გავუსვა ხაზი იმ ფაქტს, რომ ესტონეთი არის მისაბაძი მაგალითი საქართველოსთვის.
მოგახსენებთ დიდ მადლობას მეგობრობისა და პარტნიორობისთვის ამ წლების განმავლობაში, ასევე ჩვენი ყველა ძალისხმევის მხარდაჭერისთვის, ნატოში ინტეგრაციის დღის წესრიგის ჩათვლით. რასაკვირველია, ჩვენ ასევე განვიხილეთ საქართველოს ოკუპირებულ ტერიტორიებზე არსებული მძიმე ჰუმანიტარული სიტუაცია და უსაფრთხოებასთან დაკავშირებული მდგომარეობა, ასევე რუსეთის საოკუპაციო ძალების მიერ გადადგმული აგრესიული ნაბიჯები, რომლებიც მიმართულია ჩვენი რეგიონების ფაქტობრივი ანექსიისკენ, აფხაზეთში გამყოფი ხაზების მიმდებარედ ე.წ სასაზღვრო პუნქტების გაუქმების, ცხინვალის რეგიონში ჩატარებული უკანონო რეფერენდუმისა და აფხაზეთსა და ცხინვალის რეგიონში გამართული ე.წ არჩევნების ჩათვლით.
ყოველივე ეს კიდევ ერთხელ ადასტურებს საქართველოს ორივე ოკუპირებულ რეგიონში საერთაშორისო ჩართულობის და ცეცხლის შეწყვეტის შესახებ 2008 წლის 12 აგვისტოს საქართველოსა და რუსეთს შორის გაფორმებული შეთანხმების შესრულების აუცილებლობას.
კიდევ ერთხელ ხაზს ვუსვამ საქართველოს მთავრობის ერთგულებას კონფლიქტების მშვიდობიანი გზით გადაჭრის პოლიტიკისადმი. გარდა ამისა, ვსარგებლობ შემთხვევით, რათა მადლობა მოვახსენო ესტონეთის მთავრობას საქართველოს სუვერენიტეტისა და ტერიტორიული მთლიანობის მხარდაჭერისთვის, რასაც განსაკუთრებული მნიშვნელობა აქვს ესტონეთისთვის – მე-19 საუკუნიდან მოყოლებული აფხაზეთში მცხოვრები ესტონელებიც იძულებულნი გახდნენ, დაეტოვებინათ თავიანთი სახლები.
ძვირფასო პრემიერ-მინისტრო, კიდევ ერთხელ მოგახსენებთ მადლობას მასპინძლობისა და ამ რთულ პერიოდში საქართველოს მხარდაჭერისთვის. გამოვთქვამ იმედს, რომ ჩვენი თანამშრომლობა ეკონომიკისა თუ სხვა სფეროებში კიდევ უფრო გაღრმავდება. ნება მომეცით, ოფიციალურად მიგიწვიოთ საქართველოში თქვენთვის ხელსაყრელ დროს“, – განაცხადა გიორგი კვირიკაშვილმა.