2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისიის სხდომაზე, სადაც 2009 წლის 15 ივნისის მშვიდობიანი აქციის დარბევისას ადამიანის უფლებების შელახვის ფაქტები განიხილება, თბილისის საკრებულოს თავმჯდომარემ, ზურაბ აბაშიძემ ისაუბრა.
ზურაბ აბაშიძე იხსენებს, დიღმის მთავარ სამმართველოსთან მომხდარ ინციდენტს, სადაც ასამდე მშვიდობიან ადამიანს უამრავი პოლიციელი და ე.წ ზონდერ ჯგუფი დაესხათ თავს და სასტიკად გაუსწორდნენ.
„რომ მივედით დიღმის მთავარ სამმართველოსთან, ვერ წარმოიდგენთ რა რაოდენობის პოლიციელები იყვნენ, ძირითადი ნაწილი იდენტიფიცირებული არ იყო, რომ პოლიციელი იყო უბრალოდ ნიღბები, შეიარაღებულები ხელკეტებით ნავარჯიშები ადამიანები. ზოგს ეწერა „პოლიცია“, მაგრამ ბევრნი იყვნენ არა პოლიციის ფორმაში ე.წ ზონდერ ბრიგადები მონაწილეობდნენ, როგორც ჩანს.
ჩვენ არ გვქონდა ინფორმაცია, რომ ამას ამზადებდნენ. ისეთ ადგილას ვიყავით – ხუფია, გასავლელ-შემოსასვლელს ჩაკეტავ, სასამართლოს მხრიდანაც ამოვიდნენ დიდი რაოდენობით და ქვემოდანაც ამოვიდნენ, სამივე მხრიდან შემოცვივდნენ და პირდაპირ დაიწყეს ცემა. ყოველგვარი გაფრთხილების გარეშე, რომ თქვენ უკანონობას ჩადიხართ, კეტავთ სავალ ნაწილს გზისას, ან დაიშალეთ ახლა გადით აქედან“,-განაცხადა ზურაბ აბაშიძემ.