“საქართველოში რადიაციული და მომწამლავი ნივთიერებების აღმოჩენით, კონკრეტული უწყებები არიან დაკავებულნი”

მორიგი შემოგდებული პანიკის თუ სახალხო მღელვარების პრევენციის მიზნით, სუფთა საინფორმაციო ხასიათის განცხადება მაქვს. საქართველოში ჰაერის ნაწილაკების შერჩევით, რადიაციული და მომწამლავი ნივთიერებების აღმოჩენის მიზნით, შემდეგი ძირითადი უწყებები არიან დაკავებული“, – წერს სოციალურ ქსელში „ხალხის ძალის“ წევრი დავით ქართველიშვილი.

მისი თქმით, ქვეყანაში შიშების გამავრცელებელი „ექსპერტების“ მოზღვავების ფონზე, აუცილებელია ვიცოდეთ, რომ საქართველოში რადიაციული და მომწამლავი ნივთიერებების აღმოჩენის მიზნით, კონკრეტული უწყებები არიან დაკავებულნი.

„ბირთვული და რადიაციული უსაფრთხოების სააგენტო (ANRS), რომელიც არის მთავარი ეროვნული რეგულატორი (ექვემდებარება გარემოს დაცვისა და სოფლის მეურნეობის სამინისტროს). სააგენტო ამუშავებს სტაციონარულ სადგურებს რადიაციული ფონის უწყვეტი (!) მონიტორინგისთვის მთელი ქვეყნის მასშტაბით. 2024 წლიდან საქართველო ჩაერთო IAEA-ს IRMIS სისტემაში — სადგურების მონაცემები ავტომატურად იგზავნება საერთაშორისო ქსელში. სააგენტოს აქვს საკუთარი რადიაციული ლაბორატორია (გამისპექტრომეტრებით) და ახორციელებს მობილურ საზომ სამუშაოებს ქვეყნის მასშტაბით;

გარემოს ეროვნული სააგენტო მართავს ატმოსფერული ჰაერის ხარისხის ავტომატურ მონიტორინგის ქსელს, რომელიც აფიქსირებს PM2.5, PM10, NO₂, ოზონის, ბენზოლისა და სხვა დამაბინძურებლებს. მონიტორინგი მიმდინარეობს უწყვეტად — სიგნალების შემთხვევაში ხდება მოსახლეობის გაფრთხილება;

სსიპ სოხუმის ილია ვეკუას ფიზიკისა და ტექნიკის ინსტიტუტი (SIPT) – ეს არის სამეცნიერო-კვლევითი დაწესებულება, რომელიც მუშაობს ბირთვული ფიზიკისა და რადიაციული ეკოლოგიის სფეროში. ჩერნობილის ავარიის შემდეგ, ინსტიტუტი აწარმოებდა რადიოაქტიური დაბინძურების კვლევებს, ჰაერის, ნიადაგისა და წყლის ანალიზებს;

სახელმწიფო უსაფრთხოების სამსახური პასუხისმგებელია რადიოაქტიური და ქიმიური ნივთიერებების უკანონო მიმოქცევის აღკვეთაზე. ახორციელებს მონიტორინგს იმ ობიექტებზე, რომლებიც ქიმიურ-ბიოლოგიურ-რადიოლოგიურ (CBRN) საფრთხეს შეიძლება წარმოადგენდეს.

ვითვალისწინებ რა, ქვეყანაში შიშების გამავრცელებელი „ექსპერტების“ მოზღვავებას, რატომღაც საჭიროდ ჩავთვალე ამ ინფორმაციის გაზიარება…“, – წერს დავით ქართველიშვილი.