ინდოეთში ავიაკომპანია „ეარ ინდიას“ კუთვნილი თვითმფრინავის ჩამოვარდნის შესახებ წინასწარი ანგარიში გამოქვეყნდა.
შემთხვევის ადგილიდან ამოღებული შავი ყუთის მონაცემების მიხედვით, თვითმფრინავის საწვავის საკონტროლო ორივე ღილაკი, რომლებიც ჩვეულებრივ გამოიყენება ძრავების ჩართვისა და გამორთვისთვის, „run“ პოზიციიდან „cut off“ პოზიციაში გადაირთო აფრენიდან მალევე, რამაც გამოიწვია ორივე ძრავის ძალის დაკარგვა. ანგარიშში ნათქვამია, რომ კაბინაში ხმოვანი ჩანაწერის მიხედვით, ერთ-ერთი პილოტი მეორეს ეკითხება თუ რატომ გადაიყვანა კონტროლის ღილაკი cut off -ზე, რაზეც მეორე პილოტი პასუხობს, რომ მას ეს არ გაუკეთებია.
შავი ყუთის მონაცემების მიხედვით, აფრენის დროს თვითმფრინავს მეორე პილოტი მართავდა, ხოლო კაპიტანი აკონტროლებდა. მოგვიანებით, ღილაკები კვლავ დაბრუნდა ნორმალურ, ფრენის რეჟიმის პოზიციაში — ქმედება, რომელიც ავტომატურად იწყებს ძრავების ხელახალი გაშვების პროცესს. ანგარიშის მიხედვით, თვითმფრინავის ჩამოვარდნის მომენტისთვის ერთ-ერთ ძრავს ძალის აღდგენა დაწყებული ჰქონდა, ხოლო მეორე ძრავი ხელახლა ჩაირთო, თუმცა ძალის აღდგენა ჯერ დაწყებული არ ჰქონდა.
„თვითმფრინავსა და მის ძრავებთან დაკავშირებით მნიშვნელოვანი ხარვეზი არ აღმოჩენილა“, – წერია ანგარიშში.
როგორც, „ბიბისი“ წერს, ანგარიშში რაიმე კონკრეტული დასკვნა არ არის წარმოდგენილი და აღნიშნულია, რომ გამოძიება კვლავ გრძელდება, თუმცა გამოძიების ფოკუსი ახლა პილოტების ქმედებებზე გადავა.
„ბიბისი“ წერს, რომ ძრავების Cut off პოზიციაზე გადართვის დროს მყისიერად წყდება საწვავის მიწოდება, რაც ფაქტობრივად ძრავების გათიშვას ნიშნავს. ეს, როგორც წესი, მაშინ ხდება, როდესაც თვითმფრინავი უკვე დანიშნულების ადგილზეა ჩასული. ასევე, ძრავების გათიშვა შესაძლებელია გადაუდებელი სიტუაციის დროს, თუმცა წინასწარ ანგარიშში მსგავსი ბორტზე ინციდენტის დაფიქსირება აღნიშნული არ არის.