იარლიყების ეს პოლიტიკა ახალი არ არის, ძველია და საკმაოდ წარმატებითაც გამოიყენეს თავის დროზე, – განაცხადა გადაცემა „დღის ქრონიკაში“ პარტია „ხალხის ძალის“ საერთაშორისო ურთიერთობების მდივანმა, დეპუტატმა ეკა სეფაშვილმა კითხვის პასუხად, თუ რამდენად შექმნა იარლიყების პოლიტიკამ საფრთხე საქართველოს შიგნით და ასევე, საერთაშორისო ურთიერთობებშიც.
ეკა სეფაშვილის თქმითვე, საქართველოში საზოგადოებისთვის პრორუსულობის იარლიყის მიწებება აღარ სჭრის.
„ჩვენ გვახსოვს „გამჭვირვალობის კანონს“ როგორ უწოდა ამერიკის შეერთებული შტატების ყოფილმა ელჩმა რუსული კანონი და როგორ აიტაცა ხალხმა ეს იმიტომ, რომ რუსული, როგორც ასეთი საქართველოს მოსახლეობის უმრავლესობისთვის არის ის წითელი ხაზი, რაც საზოგადოების ყველაზე მეტ ნეგატიურ დამოკიდებულებას იწვევს. თუმცა, შემდგომ დროთა ვითარებაში, როდესაც უკვე ყველაფერს რუსულს, პრორუსულს უწოდებენ, იმდენად გაცვდა ეს ტერმინი, რომ გარკვეული კომიკური ელფერი შეიძინა საქართველოს სინამდვილეში. ყველაფერს რუსულს უწოდებენ.
დავალება, მართალია მიღებული აქვთ, რომ იარლიყები მიაწერონ რუსულის და პრორუსულის ყველაფერს, მაგრამ იმდენად უნიჭოდ ასრულებს ჩვენი ე.წ. ოპოზიცია და სინამდვილეში საგარეო ძალების აგენტები ამ დავალებას, რომ ეს დავალება თავის მიზანს ვერ აღწევს და უკვე დაკარგა თავისი სიმწვავე. ფაქტია და ცხადია, რომ საქართველოში საზოგადოებისთვის ეს პრორუსულობის იარლიყის მიწებება აღარ სჭრის. აღარავის სჯერა, რომ საქართველოს ხელისუფლება არის პრორუსი მხოლოდ იმ ფაქტის გამო, რომ ისინი ასე უწოდებენ მას“, – აღნიშნა ეკა სეფაშვილმა.