აჭარის ავტონომიური რესპუბლიკის უმაღლესი საბჭოს წევრი „ქართული ოცნებიდან“ ცოტნე ანანიძე სოციალურ ქსელში აზიარებს „არქივი“-დან ვიდეოს, სადაც დღევანდელი ოპოზიციის წარმომადგენლები აგვისტოს ომის მოვლენებთან დაკავშირებით რადიკალურად განსხვავებულ განცხადებებს აკეთებდნენ.
ვიდეოში ვისმენთ გიორგი მარგველაშვილის, სალომე ზურაბიშვილის, გუბაზ სანიკიძის, ლევან ბერძენიშვილის, ლაშა ბუღაძის, შალვა ნათელაშვილის, გიორგი თარგამაძის განცხადებებს, რომლებიც აგვისტოს ომზე პასუხისმგებლობას მიხეილ სააკაშვილს აკისრებენ.
„არ უნდა გეგონოს, რომ დემოკრატიული სახელმწიფო რუსეთს გადაეფარება იმისთვის, რომ შენ დაგიცვას“, „ცხინვალის დაბომბვის ფაქტები საქართველოს მხარემ დაიწყო“, „მის ცანცარს შეეწირა ეს ქვეყანა“ „მძინარე ცხინვალზე თავდასხმა, წამოწყება იმ ომისა, რომელიც დასაწყისშივე წასაგებად იყო განწირული არის საერთაშორისო დანაშაული“, „სააკაშვილმა ვერ დამანახა მე, როგორც მოქალაქეს, რომ ის ცდილობდა ამ ომის ჩემგან აცილებას.“ „სააკაშვილია პერსონალურად პასუხისმგებელი იმაზე, რაც მოხდა 2004 წლის ზაფხულში, როდესაც დაიწყო ცხინვალის ავანტიურა, რომლის დასასრულიც იყო ის, რაც მოხდა 2008 წელს“- ამ განცხადებების ავტორები, სწორედ ზემოთ ჩამოთვლილი ადამიანები არიან.
ამ ფონზე, ანანიძე მიიჩნევს, რომ „სწორედ ეს არის სამშობლოსა და გმირების გამოყენება პოლიტიკური მიზნებისთვის.“
„ასეთი განცახდებების ავტორები, იმავე განცხადებებზე რომ მოღალატეს გიწოდებენ, სწორედ ეს არის სამშობლოსა და გმირების გამოყენება პოლიტიკური მიზნებისთვის. ფიცი მწამს, ბოლო მაკვირვებს….“-წერს ცოტნე ანანიძე.