ბიზნესმენი, ტელეკომპანია „იმედის“ მფლობელი ირაკლი რუხაძე ლევან გაჩეჩილაძის გარდაცვალებას სამძიმრის წერილით ეხმიანება.
„აღარ გვყავს ლევან გაჩეჩილაძე.
აღარ გვყავს გრეჩიხა.
ლევანის წასვლით, საქართველომ ღირსეული შვილი დაკარგა. იგი დამარცხდა უკურნებელ სენთან. დამარცხდა ხანგრძლივი, თავდაუზოგავი ბრძოლის შემდეგ. ყველა, ვინც ამ ბრძოლას ვუყურეთ, გაოცებულები ვიყავით მისი ენერგიით და შეუპოვრობით, მისი სიძლიერით ბოლო წუთამდე, ბოლო ამოსუნთქვამდე. მხოლოდ ლევანს შეეძლო ასეთი თავდადებით ებრძოლა. ებრძოლა ისე, როგორც 18 წლის წინ ებრძოდა სხვა სენს, რომელიც მაშინ ჩვენს ქვეყანას ჰქონდა მოდებული. ოღონდ მაშინ ლევანმა ის სენი დაამარცხა, თუმცა გამარჯვება მას თაღლითურად წაღლიტეს. 2008 წლის არჩევნების შემდეგ, ბევრი ჩვენგანისთვის ლევანი იყო ჩვენი ქვეყნის პრეზიდენტი. საქართველოზე შეყვარებული მაგარი ბიჭი, რომელიც მრავალი მცდელობის მიუხედავად ვერ გატეხა ძლიერმა და ბოროტმა ძალამ. ვერ გატეხა ვერც ფიზიკურად და ვერც მორალურად. ზუსტად ამ სიყვარულის გამო, 2008 წლის აგვისტოში, როცა საქართველო განადგურების საფრთხის წინაშე იდგა, ლევანმა თავის მომხრეებს მოუწოდა, რომ დაევიწყებინათ განსხვავებული შეხედულებები და საქართველოს ინტერესებიდან გამომდინარე იმ ხალხის გვერდით დამდგარიყვნენ, ვინც მას პრეზიდენტობა მოპარა. აი, ესეთი იყო გრეჩიხა.
სიცოცხლის ბოლომდე, მაშინაც კი, როცა ძალიან სუსტად იყო, საქართველოზე ფიქრობდა. სანამ სიარული შეეძლო, კვირაში რამდენჯერმე მოდიოდა ჩემთან ოფისში და იქ მყოფებს გვიხსნიდა, თუ რა გავლენა ექნებოდა საქართველოზე ამა თუ იმ მნიშვნელოვან მოვლენას. რაც მთავარია, თავის თავს სულ ხედავდა ამ მოვლენების თანამონაწილედ და ამით ჩვენც გვაჯერებდა, რომ ავადმყოფობა ვერაფერს დააკლებდა.
ლევანი უზომოდ დააკლდება თავის ოჯახს და დაგვაკლდება მის მეგობრებს, მაგრამ ის ასევე ძალიან დააკლდება ჩვენს თბილისს და ჩვენს საქართველოს. თბილისს ხომ განუმეორებელ პეწს და შარმს ლევანისნაირი ხალხი აძლევს. ხოლო საქართველოს იმიტომ, რომ მაშინაც კი, როცა ლევანი აღარ იყო აქტიურ პოლიტიკაში, მხოლოდ მისი არსებობაც კი აკავებდა ბევრ ცუდ განზრახვასა და იმპულსს.
ნათელი დაადგეს!”, – წერს ირაკლი რუხაძე.
ბიზნესმენი და პოლიტიკოსი ლევან გაჩეჩილაძე 20 აგვისტოს 61 წლის ასაკში გარდაიცვალა.