„ერთიანი ნეიტრალური საქართველოს“ ერთ-ერთმა დამფუძნებელმა, ბიძინა გიორგობიანმა გადაცემაში „EURO ანატომია“ ევროკავშირისა და საქართველოს შორის, რუსეთ-უკრაინის ომამდე არსებული ურთიერთობების აღდგენაზე ისაუბრა. მან უპასუხა გადაცემის წამყვანის შეკითხვას, არსებობს თუ არა რაიმე შეხების წერტილები, რომლიდანაც ურთიერთობების აღდგენა დაიწყება.
„ერთადერთი, რასაც ევროკავშირი ჩვენ ძალიან კარგ ნაბიჯად ჩაგვითვლის, ეს იქნება, რომ სუიციდის აქტი ჩავატაროთ, ომი გამოვუცხადოთ რუსეთს და ეკონომიკური ემბარგო დავადოთ.
ჩვენ ის მოლოდინიც გვქონდა, რომ აშშ-ში ბაიდენის ადმინისტრაცია როგორც კი შეიცვლებოდა, ურთიერთობების გაჯანსაღება დაიწყებოდა. ვხედავთ, რომ უკვე 2 ღია წერილი მისწერეს აშშ-ს და იქიდან სრული დუმილია. ეს არის გლობალური პოლიტიკური გადაფორმატირების პერიოდი, როდესაც დიდი ქვეყნები ერთმანეთთან ურთიერთობას ალაგებენ და გავლენის სფეროებს იყოფენ. ამ გადალაგებასა და გადაფორმატირებაში ევროკავშირი ვერ მონაწილეობს“, – აღნიშნა ბიძინა გიორგობიანმა.