მულტიფუნქციური ცენტრების განვითარება მთელი ქვეყნის მასშტაბით ჩვენი ერთ-ერთი უმთავრესი პრიორიტეტი იქნება, – ამის შესახებ საქართველოს პრემიერ-მინისტრმა ირაკლი კობახიძემ სამგორის მრავალფუნქციური საზოგადოებრივი ცენტრის გახსნაზე სიტყვით გამოსვლისას განაცხადა.
ახალი მრავალფუნქციური საზოგადოებრივი ცენტრი მთავრობის მეთაურმა თბილისის მერ კახა კალაძესთან ერთად გახსნა.
პრემიერმა და დედაქალაქის მერმა საზოგადოებრივი ცენტრი დაათვალიერეს, რომელიც საცურაო აუზებს, ფიტნესის, ტანვარჯიშის, კალათბურთისა და საბრძოლო ხელოვნების დარბაზებს აერთიანებს.
11 500 კვ.მ ფართობზე განთავსებულ მრავალფუნქციურ ცენტრში ასევე იფუნქციონირებს ფრენბურთის, კრივის, ჭიდაობისა და ძიუდოს წრეები, სპა ზონა, მედიათეკა, ქორეოგრაფიული სტუდია და მოსწავლე-ახალგაზრდობის ცენტრი.
პრემიერ-მინისტრის განცხადებით, ძალიან მნიშვნელოვანია, რომ დედაქალაქში ყველა უბანს ჰქონდეს ასეთი მულტიფუნქციური ცენტრი და მთავრობის მხრიდან დედაქალაქის მერიას ამ მიმართულებით სრული მხარდაჭერა ექნება.
“ბევრ ქვეყანაში მინახავს ასეთი ცენტრები და შემიძლია ვთქვა, რომ უმაღლეს დონეზე, უმაღლესი სტანდარტებით არის შესრულებული სამუშაოები, შთამბეჭდავია ეს პროექტი. მინდა, მადლობა გადავუხადო დედაქალაქის მერს, ბატონ კახა კალაძეს და თითოეულ ადამიანს, რომელიც ჩართული იყო ამ პროექტის განხორციელებაში. ეს არის ის, რაც ყველაზე მეტად სჭირდება ჩვენს დედაქალაქს, მთლიანად ჩვენს ქვეყანას. გვინდა, თითოეულ მუნიციპალიტეტში შეიქმნას სწორედ ასეთი უმაღლესი სტანდარტების მულტიფუნქციური ცენტრები. ეს არის მნიშვნელოვანი ახალგაზრდებისთვის, ბავშვებისთვის, თუმცა არა მხოლოდ”, – განაცხადა ირაკლი კობახიძემ.
სამგორის მრავალფუნქციური საზოგადოებრივი ცენტრი, სრული დატვირთვით ამუშავების შემდეგ, ყოველთვიურად 10 000-მდე მოქალაქეს მოემსახურება. პროექტის ჯამურმა ღირებულებამ 20 მილიონი ლარი შეადგინა.
