საზოგადოებაში ბოლო დროს ოპოზიციური ძალებისა და მათი მხარდამჭერი ჯგუფების მხრიდან ძალადობრივი რიტორიკა ისმის, რომელიც პირდაპირ მიმართულია დაპირისპირების გამწვავებისა და ქუჩაში ძალადობრივი სცენარების განვითარებისკენ,- ასე ეხმიანება ექსპერტი, დავით ჩიხელიძე ოპოზიციის აქტივისტის, ნანა სანდერის განცხადებას ჯარის შეკრებასთან დაკავშირებით.
ჩიხელიძის განცხადებით, სახელმწიფო ვალდებულია, რომ დაიცვას მშვიდობა და საზოგადოებრივი წესრიგი და ოპოზიციის პასუხიმგებლობაა, პოლიტიკური ბრძოლა დარჩეს კანონის ფარგლებში.
„საზოგადოებაში ბოლო დროს ოპოზიციური ძალებისა და მათი მხარდამჭერი ჯგუფების მხრიდან ძალადობრივი რიტორიკა ისმის, რომელიც პირდაპირ მიმართულია დაპირისპირების გამწვავებისა და ქუჩაში ძალადობრივი სცენარების განვითარებისკენ. ასეთი განცხადებები სცილდება პოლიტიკურ კამპანიას და თავისუფალი სიტყვის ფარგლებს — როდესაც საუბარია ჯარისკაცების მობილიზებაზე, საბრძოლო გამოცდილების მქონე ადამიანების შეკრებაზე, „ქუჩის ბრძოლის“ სტრატეგიებზე და ა.შ. ეს უკვე ძალადობისკენ მოწოდებაა და არა გამოხატვის თავისუფლება.
საქართველოში ხელისუფლების ლეგიტიმურობა არჩევნებით დგინდება, მოქალაქეთა თავისუფალი არჩევანით და კონსტიტუციით განსაზღვრული წესრიგით. სწორედ ამიტომ ნებისმიერი მცდელობა, რომელიც სახელმწიფოს ფუნქციებს, პოლიციასა და უსაფრთხოების სისტემას უპირისპირდება, წარმოადგენს არა დემოკრატიის გამოხატულებას, არამედ მის წაქეზებას. ძალადობაზე ორიენტირებული სცენარები მიუღებელია და მათ შესაბამისი სამართლებრივი პასუხი მოჰყვება. სახელმწიფოს ვალდებულებაა დაიცვას მშვიდობიანი მოსახლეობა, საზოგადოებრივი წესრიგი და უსაფრთხოება.
ამიტომ ხელისუფლება ვერც შეეგუება, ვერც დაუშვებს იმ პროცესებს, რომლებიც მიზნად ისახავს სამოქალაქო დაპირისპირების პროვოცირებას. ოპოზიციის პასუხისმგებლობაა, რომ კრიტიკა და პოლიტიკური ბრძოლა დარჩეს მხოლოდ კანონიერ ფორმატში — არჩევნებში, დებატებში, საკონსტიტუციო ინსტიტუტებში. „რევოლუციური სცენარები“ ამ ქვეყანაში არ განხორციელდება.
საქართველოს მოქალაქეები არ აპირებენ უარი თქვან მშვიდობაზე და ჩაებან სისხლიან დაპირისპირებაში. ძალადობრივი ქმედებების ორგანიზატორებს კანონი მკაცრად მოსთხოვს პასუხს, რადგან ქვეყანა უნდა იცავდეს არა ქუჩის ბრძოლას, არამედ მშვიდობას, სტაბილურობასა და განვითარების პერსპექტივას“,- წერს დავით ჩიხელიძე.