4 ოქტომბრის გეგმას ისინი უწოდებენ მშვიდობიან რევოლუციას. ასე ვარდების რევოლუციას უწოდებდნენ, რის შემდეგაც გვქონდა სისხლიანი 9 წელი, – განაცხადა „ქრონიკასთან“ საუბრისას პარლამენტის თავმჯდომარის მოადგილემ, ნინო წილოსანმა.
იგი ოპოზიციის მიერ დაანონსებულ 4 ოქტომბრის აქციას გამოეხმაურა.
„სწორედ ასეთი ლამაზი ეპითეტებით ამკობენ იმ ძალადობასა და მავნებლობას, რომელსაც თავადვე არ უარყოფენ. აპირებენ ყოფილი ძალოვნების თუ სხვადასხვა პირის ფიზიკური ძალის გამოყენებით ძალადობას, სახელმწიფოს ანტიკონსტიტუციური მეთოდებით დამხობას. ამ პირობებში, როდესაც ემუქრებიან ქართველ ხალხსა და ქართულ სახელმწიფოს, დარწმუნებული ვართ და უკვე ვხედავთ, რომ თითოეული მათგანი საკადრის პასუხს მიიღებს. ყოველ შემთხვევაში 4 ოქტომბერი იქნება ქართველი ხალხისა და „ქართული ოცნების“ გამარჯვების დღე. ყველა სხვა დანარჩენი კი დამარცხდება ქართულ სახელმწიფოსთან ბრძოლაში“, – განაცხადა წილოსანმა.
ოპოზიცია 4 ოქტომბრის აქციისთვის ემზადება და რადიკალურ გეგმებს აანონსებს. მმართველი გუნდი დარწმუნებულია, რომ მათი ოპონენტების ყველა ძალადობრივი ქმედება მარცხისთვისაა განწირული, სამართალდარღვევის ნებისმიერ ფაქტს კი სახელმწიფოს მხრიდან კანონის ფარგლებში შესაბამისი რეაგირება მოჰყვება.