საქართველოს შიდა და საერთაშორისო სამართლის ნორმების დარღვევად შეაფასა „ხალხის ძალის“ საერთაშორისო ურთიერთობების მდივანმა ეკა სეფაშვილმა ეუთოს მოქმედი თავმჯდომარის მიერ გადადგმული ნაბიჯი, როდესაც ის რუსთაველის გამზირზე რადიკალების აქციას დაესწრო და მათ თანადგომა გამოუხატა.
როგორც ეკა სეფაშვილმა პარლამენტის პლენარულ სხდომაზე განაცხადა, საქართველო ეფუძნება ქრისტიანულ ღირებულებებს და მომავალშიც იმ ფასეულობებით იხელმძღვანელებს, რაც თავის დროზე გახდა ევროკავშირის შექმნის საფუძველი.
„შეუძლებელია კიდევ ერთხელ არ გამოვეხმაუროთ იმ უტიფრობას, რასაც ადგილი ჰქონდა საქართველოში ფინეთის საგარეო საქმეთა მინისტრის სტუმრობისას. საქართველოს შიდა და საერთაშორისო სამართლის ნორმების დარღვევით ქალბატონი ელინა მივიდა მიტინგზე და მხარი დაუჭირა სახელმწოფოს ძალადობრივი მეთოდებით შეცვლის მსურველ იმ ათიოდე ადამიანს, რომლებიც ყოველგვარი კანონების დარღვევით კეტავენ რუსთაველის გამზირს და ვითომდა პროტესტს გამოხატავენ, თუმცა პროტესტს რის წინააღმდეგ, აბსოლუტურად გაუგებარია. ეს ქალბატონი ამ ეტაპზე წარმოადგენდა ერთი მხრივ ფინეთის საგარეო საქმეთა მინისტრს, მეორეს მხრივ კი ჩამოსული იყო საქართველოში როგორც ეუთოს თავმჯდომარე ქვეყნის წარმომადგენელი. ჩვენ ვიხილეთ მისი პრესკონფერენცია, სადაც მისი მხრიდან მსგავსი არაფერი თქმულა და უცებ, მეორე დღეს ვიხილეთ გაუგონარი მხარდაჭერა იმ ძალადობის, რომელსაც მთელ მსოფლიოში გმობენ. სულ რამდენიმე დღის წინ ეუთოს წარმომადგენელმა საჯარო განცხადებაში დაგმო ის ძალადობრივი მიტინგი და შეკრება, რომელსაც საქართველოში ადგილი ჰქონდა 4 ოქტომბერს. ასეთი ორმაგი მიდგომები და სტანდარტები ჩვენი ქვეყნის მიმართ უცხო არ არის სხვადასხვა ევრობიუროკრატების და დასავლელი პოლიტიკოსების მხრიდან. ქართველი ხალხისთვის ძალიან რთულია ასეთი ორმაგი მიდგომების ატანა, ასეთი უსამართლო განცხადებების მოსმენა და ამ ყველაფერზე მშვიდად რეაგირება. სრულიად არ არის გასაკვირი, რომ ბოლო პერიოდში ევროკავშირში ინტეგრაციის მიმართ ნდობა რამდენიმე პროცენტით შემცირდა. სწორედ ასეთი დამოკიდებულებები ამცირებს საქართველოში ევროინტეგრაციისადმი და ევროპული ფასეულობისადმი ნდობას, რაც კარგი სულაც არ არის და მწუხარებით აღვნიშნავ ამ ფაქტს.
წარმოუდგენელია და ძალიან დიდი სირცხვილია ევროპული დემოკრატიისათვის ევროკომისიის პრეს-სპიკერის განცხადება, როდესაც ის მოუწოდებდა ხალხს 4 ოქტომბრის ე.წ. მშვიდობიან ამბოხში მონაწილეობისკენ. მიუღებელია ევროპული სამართლისათვის იმ ზოგიერთი ევრობიუროკრატის განცხადება, რომელიც მოითხოვს საქართველოს ხელისუფლების დასჯას იმ დემოკრატიის შექმნისათვის, რომელიც თვით ევროკავშირის მიერ აღიარებულია და შეფასებულია როგორც ერთ-ერთი მოწინავე. ეს შეფასებები ისეთი დონისაა, რომლითაც საქართველო წინ უსწრებს ევროკავშირის წევრ ქვეყნებსაც კი.
ასევე მიუღებელია და საერთაშორისო სამართლის ყოველგვარი ნორმის დარღვევაა ზოგიერთი პარლამენტარის მუქარა საქართველოს ხელისუფლების მიმართ და სპეკულირება უვიზო მიმოსვლის შეჩერების თემით. უვიზო მიმოსვლა ობიექტურ კრიტერიუმებს ემყარება და პირველ რიგში ის იმისთვისაა შემოღებული, რომ ევროკავშირის სივრცე დაცული იქნას არალეგალური მიგრაციისაგან, რასაც საქართველო წარმატებით ართმევს თავს. ამ ბოლო პერიოდში იმის მცდელობა რომ უვიზო მიმოსვლას რაღაც პოლიტიკური მდგენელი დაემატოს, სწორედ ნიშნავს იმას, რომ უსამართლო პოლიტიკური მიდგომების გამოყენებას აპირებენ მომავალში, რასაც არც ქართველი ხალხი მოითმენს და მე დარწმუნებული ვარ, ასე მარტივად ამ უსამართლო გადაწყვეტილებას არც ევროპელი ხალხები მიიღებენ.
ძალიან ხშირად ვისმენთ ხმამაღალ პოლიტიკურ განცხადებებში საზღვარგარეთიდან, რომ საქართველოში დემოკრატიის უკუსვლაა, რომ საქართველომ ვითომ შეაჩერა ევროინტეგრაციის პროცესი და ამ ბოლო პერიოდში ჩვენ მოვისმინეთ 2 ძირითადი მოთხოვნა – პირველი, ეს არის გამჭვირვალობის კანონის და მეორე, ოჯახური ღირებულებების კანონის უკან გაწვევა. გამჭვირვალობის კანონი არ უნდათ სწორედ იმ ძალებს, რომლებსაც საქართველოში შავი ფულით და ფარული მეთოდებით სურთ ქვეყანაში ხელისუფლების ძალისმიერი მეთოდებით შეცვლა. საინტერესოა, ევროკავშირი ამ ძალების კარნახით და მათი დავალების შესაბამისად მოქმედებს, თუ ჯერ კიდევ არსებობს ევროკავშირში საღი აზრი და ჭეშმარიტად ევროპული ფასეულობების დამცველი პოლიტიკოსები, რომლებიც ამ ყველაფერს წინ აღუდგებიან. და მეორე, ოჯახური ღირებულებების კანონი – ევროკავშირი შეიქმნა, განმტკიცდა და განვითარდა სწორედ ქრისტიანული ფასეულობების ირგვლივ. ახლა, როგორც ვხედავთ, სწორედ ამ ქრისტიანული ღირებულებების დაცვის საფრთხე წარმოიშვა, როდესაც მიიღეს სტრატეგია ლგბტ პირები უფლებების დაცვის განმტკიცების და ვინც ამ სტრატეგიას ჯეროვან დონეზე არ შეასრულებს მათთვის გარკვეული ფინანსური სანქციების დაწესების შესახებ.
ყველას შევახსენებ, რომ საქართველოში ეროვნული, ქრისტიანული, ოჯახური ღირებულებების დაცვას ბოლო ერთი წლის განმავლობაში ქართველმა ხალხმა ორჯერ მისცა ხმა – ერთი 2024 წლის საპარლამენტო არჩევნებში და მეორე, 2025 წლის მუნიციპალურ არჩევნებზე. ანუ, ეს არის ის ფასეულობები, რასაც მხარს უჭერს ქართველი ხალხი.
ძალიან სამწუხაროა, როცა ევროკავშირის მხრიდან ასეთ მცდარ ღირებულებებზე დამყარებული სტრატეგიების გატარების მცდელობებს ვხედავთ, როგორც ევროკავშირში, ასევე საქართველოში.
თუმცა, მე მაინც ოპტიმისტურად ვარ განწყობილი და მჯერა, რომ ის საერთო ღირებულებები, ფასეულობები, რომელსაც ემყარება ცივილური სამყარო, ევროკავშირის ქვეყნები და რა თქმა უნდა, საქართველო, ის ღირებულებები, როგორიცაა ადამიანის უფლებები, ტოლერანტობა, გამოხატვის თავისუფლება, სამართლიანობის ურთიერთპატივისცემა, ურთიერთნდობა და პოზიტიური ურთიერთდამოკიდებულება, მაინც იტყვის თავის სიტყვას და მსოფლიოც, ევროკავშირიც და საქართველოც დაუბრუნდება, სწორედ ამ ფასეულობების დაცვისაკენ მიმართულ განვითარებას და ამ ფასეულობების დაცვისთვის, არც საქართველო დაისჯება, არც ქართველო ხალხი და არც რომელიმე სხვა ქვეყანა,“ – განაცხადა ეკა სეფაშვილმა.